مۇعالىمدەردىڭ شىنايى ءومىرىن بايانداعان بويجەتكەن كوپشىلىكتەن قولداۋ تاپتى

استانا. قازاقپارات - الەۋمەتتىك جەلى قولدانۋشىسى روكسولانا تسوي مەكتەپ مۇعالىمى بولۋدىڭ قانشالىقتى قيىن ەكەنىن جازدى.

ول مۇعالىمدەردىڭ قاعازباستىلىقتان قۇتىلمايىنىن ايتىپ، ۇستاز بولۋدىڭ كەمشىلىكتەرىن ءتىزىپ شىققان دەپ جازادى Baq.kz.

كەمشىلىگى:

1. جالاقى. 50-55 مىڭ جالاقىمەن، كەلىسەرسىز، قارىزعا عانا ءومىر سۇرە الاسىڭ. قارىز الاسىڭ قايتاراسىڭ قارىز الاسىڭ. تەك جولىما جارتى جالاقىم كەتەدى...

2. جۇمىس كەستەسى. تاڭەرتەڭ ىستەيسىڭ بە، تۇستەن كەيىن بە، ماڭىزدى ەمەس. تاڭعى 8 دەن 13.00 گە دەيىن جۇمىس ىستەي وتىرىپ، مۇعالىمدەر جەتىسپەگەندىكتەن مىندەتتى تۇردە بىرەۋدى الماستىرۋ ءۇشىن تۇستەن كەيىن دە جۇمىستا قالاتىنىڭ بەلگىلى. 12 ساعات اياقتان تىك تۇرىپ جۇرگەنىڭە ءبارىنىڭ تۇكىرگەنى بار. مەكتەپ ءۇيىڭ. شارشاعاننان كوزىڭ ءىسىپ، جاناشىر ارىپتەستەرىڭنىڭ «ءتۇرىڭ نە بوپ كەتكەن؟» دەپ ايايتىنى بار (ايەلدەر ۇجىمى جىلاندار مەكەنى). ەرىك-جىگەرىڭ دە، فيگۋراڭ دا كەلمەسكە كەتەدى (سەبەبى دۇرىس تاماقتانۋ جوق).

3. قاعازباستىلىق. بىتپەيتىن ەسەپتەر، كەستەلەر مەن جوسپارلار. قولىڭدا «كوميسسيا ءۇشىن» دەگەن جالاۋمەن ەشكىمگە قاجەتى جوق اقپاراتتار نىعىزدالعان قىرعىن پاپكالار. سول كوميسسيا مەكتەپتە تۇراتىن سياقتى ءوزى. بىتپەيتىن تەكسەرۋلەر. كوميسسياعا دايىندىعىمىزدى تەكسەرەتىن كوميسسيالار بار. تەكسەرۋشىلەر سەن وقىتاتىن وقۋشىلاردان دا كوپ، قانداي دا ءبىر قۇجات جەتىسپەي قالسا، اركىم سەنى جاي عانا ماقۇلىق ەمەس، ءۇش ەسەلەنگەن ماقۇلىق قىپ كورسەتكىسى كەلەدى. ارينە، داپتەرلەر... بىتپەيتىن تاۋ-تاۋ داپتەرلەر. سىنىبىڭدا 37 بالا بولسا، 37 داپتەردى 4 كە كوبەيتسەڭ، كەشكە تەكسەرۋ كەرەك داپتەر سانى شىعادى. كەيدە باقىلاۋ جۇمىسى دەگەن بونۋس بار.

4. جالپىعا ورتاق ءبىلىم. جىلىنا ەكى رەت جازدا جانە جاڭا جىلدان سوڭ، اياز سىقىرلاپ تۇرعان كەزدە پاتەر ارالاپ، 0 مەن 18 جاس ارالىعىنداعى بالالاردىڭ ءتىزىمىن جاسايمىز. ەگەر ءبىزدىڭ مەكتەپتە وقىماسا، ونىڭ مەكتەبىنە بارىپ، انىقتاما الامىز. ءارقايسىمىزدا 100-200 پاتەردەن. ادامدار كوزىڭشە ەسىكتى تارس جاۋىپ، بوق-اۋىز ءسوز ايتىپ، كەيبىرى قىرىنداپ جاتقاندا، سىپايىلىق تانىتىپ، بارىنە توزۋگە تۋرا كەلەدى. انىقتاما جيناماي، ءبىر پاتەر قالىپ كەتسە، سوگىس الاسىڭ. ءۇش سوگىستەن سوڭ جۇمىسىڭمەن قوش ايتىسۋىڭا بولادى.

5. سىرتقى كەلبەتىڭ مەن جەكە ءومىرىڭ جايلى ايتۋعا اۋىز بارمايدى. ءۇستى-باسىڭ بور جاعىلعان نەمەسە سيا-سيا، كيگەن كيىمىڭە اجەڭ عانا قىزىعادى. جۇمىستا وڭشەڭ ايەلدەر مەن تۇتە-تۇتەسى شىققان فيزرۋك قانا. ءبىر-ەكى جىل شىداساڭ، سەنىڭ دە تاعدىرىڭ وسىنداي بولادى. زومبيگە ۇقسايتىن قىز كىمگە كەرەك؟ قىزىعاتىن ادام بار ما؟ تىپ-تىنىش)) جىگىتتەر-اۋ، قىدىرمايتىن، ۇيكۇشىك قىز قالاۋشى ەدىڭدەر عوي... مەن كلۋبقا بارمايمىن، فەيسكونترولدەن وتپەي قالام). قايداعى كلۋب، تاڭعى 6 دا جۇمىسقا تۇرۋىم كەرەك. مەنىڭ قۇربى-قۇرداستارىم وزدەرىنە ادەمى كويلەك تاڭداپ، ۇزىن كىرپىك جابىستىرىپ جۇرگەندە، مەن كەستە قۇرىپ، جوسپار جازىپ وتىرام. ەركەكتەرگە ءوز-ءوزىن كۇتەتىن قىز كەرەك، سوندىقتان تاعدىرىڭا كونۋگە تۋرا كەلەدى. جەكە ءومىر تۋرالى ۇمىت.

6. ماماندىعىمنىڭ جاعىمدى تۇسىنا كەلسەك. ول بىرەۋ عانا. سەنى كىرشىكسىز، رياسىز سەزىممەن جاقسى كورەتىن وقۋشىلارىڭ، ارينە ەگەر سەن مەن سياقتى كەرەمەت مۇعالىم بولساڭ... مەن مەكتەپكە كىرىپ، ءبىر كۇن بويى كورمەي، ساعىنىپ، قۇشاقتاۋ ءۇشىن الدىمنان جۇگىرىپ شىققان بالاقايلاردى كورگەندە... قاتەلەسىپ، ءسوز اراسىندا ماما دەپ قالعاندا... كەشەگى كۇنى قالاي وتكەنىن اڭگىمەلەپ بەرگەندە... سالعان سۋرەتتەرىن ساعان نەمەسە ماماسىنا سىيلاعاندا... سەن ولاردىڭ ەڭ جاقىن دوسى بولعاندا، مەكتەپتە نە ءۇشىن جۇرگەنىڭدى تۇسىنەسىڭ.

P.s. ەگەر مەنى وسى جازبا ءۇشىن جۇمىستان شىعارىپ تاستاسا، كىمدە-كىم مەنى جۇمىسقا الىڭىزدارشى...