ديماش قىتايدىڭ مەرەكەلىك كونسەرتىندە «وي جايلاۋ» ءانىن شىرقادى - كەسكىن
«بۇگىن قىتايدىڭ اتاقتى شىراقتار فەستيۆالى كەشىندە كەنەن ازىربايەۆ اتامىزدىڭ «وي جايلاۋ» ءانىن شىرقايمىن! تىكەلەي ەفيردە 19:30 (بەيجىڭ ۋاقىتىمەن) Hunan Tv ارناسىندا! قىتايدا ايتىلاتىن العاشقى قازاقشا ءانىمدى جاقسى قابىل الاسىزدار دەپ ويلايمىن!»،- دەپ جازعان بولاتىن ءانشى ينستاگرامداعى پاراقشاسىندا.
ەسكە سالا كەتسەك، يۋان شياۋ - قىتايدىڭ ءداستۇرلى «شىراقتار» مەرەكەسى. ءار جىلى «كوكتەم مەرەكەسى» اتالاتىن قىتايدىڭ جاڭا جىلىنىڭ 15-كۇنى تويلانادى. كوشەلەرگە جانە ۇيلەردىڭ اۋلاسىنا ارنايى جاسالعان شىراقتار ءىلىنىپ، وتباسى مۇشەلەرى تاڭ يۋان دەپ اتالاتىن ۇلتتىق تاعامدارىن ءدام تاتادى.
حۋنان تەلەارناسى ءار جىل سايىن تانىمال جۇلدىزداردى شاقىرىپ، مەرەكەلىك كونسەرتتى تىكەلەي ەفيردەن كورسەتەدى. ايتا كەتەيىك، قازاقستاندىق ءانشى بۇعان دەيىندە حۋنان تەلەارناسىنىڭ الەم قىتايلارىنا ارنالعان «كوكتەم مەرەكەسى» كونسەرتىندە ونەر كورسەتكەن بولاتىن.
اۆتور: مۇحتار قاليموللا ۇلى
