امەريكالىقتىڭ قوس بەلبەۋىن تارتىپ العان قازاق بوكىسشىسى
بۇل جەڭىس جەرلەسىمىزگە وڭايلىقپەن كەلمەگەنى بەلگىلى. جاقيانوۆتىڭ ەڭ قاۋىپتى قارسىلاسى اتانعان روۋشي ۋوررەن كىم؟ ول بۇگىن نەگە قازاق بالاسىنىڭ گۇرزى جۇدىرىعىنا شىداس بەرە المادى؟ وسى سۇراقتارعا جاۋاپ ىزدەپ كورەيىك.
قازاقستاندىق كاسىپقوي بوكس شەبەرلەرىنەن چەمپيوندىق كەزدەسۋلەرگە سوڭعى جىلدارى تەك گولوۆكين شىعىپ ءجۇر. سونداي-اق، بەيبىت شۇمەنوۆ تە سونداي تيتۋلدىق ايقاسقا شىعىپ جاتادى. ال وسىعان دەيىن كوپتىڭ كوزىنە تۇسە بەرمەگەن قىزىلجارلىق قىران جانات جاقيانوۆ WBA جانە IBO تيتۋلدارى ءۇشىن ايقاسقا تۇسەدى دەگەندە كوپتەگەن ادامداردىڭ كۇمانمەن قاراعانى بەلگىلى.
ءتىپتى، شەتەلدىك جانكۇيەرلەر ۋوررەنعا الدىن- الا 100 پايىز جەڭىستى سىيلاپ ۇلگەردى. ول وسىنداي سەنىمگە نەسىمەن يە بولدى؟ روۋشي ۋوررەن ءبىرىنشى رەت 17 جاسىندا العاشقى وليمپيادا ويىندارىنا قاتىسىپتى. 2004-جىلى افينىدا امەريكالىق بوكسشى ءبىرىنشى كەزەڭدە بولاشاق ەكى دۇركىن وليمپيادا چەمپيونى قىتايلىق زوۋ شيميننەن جەڭىلىپ قالسا، اراعا ءتورت جىل سالىپ، بەيجىڭ وليمپياداسىندا كورەيالىق لي وك سۋننان جەڭىلىپ، ءبىرىنشى راۋندتا جارىس جولىنان شىعىپ قالادى. سونداي-اق، ول ءۇشىنشى رەت لوندون وليمپياداسىنا قاتىسىپ، تاعى دا جەڭىلىستىڭ اشى ءدامىن تاتادى. وسى ساتسىزدىكتەن كەيىن روۋشي كاسىپقوي بوكسقا ءبىرجولا بەت بۇرادى.
سول-اق ەكەن، كاسىپقوي رينگتە ۋوررەننىڭ جۇلدىزى جانادى. نەبارى ءۇش جىل ىشىندە 14 كەزدەسۋ وتكىزىپ، بارلىعىندا جەڭىسكە جەتەدى. ال ون بەسىنشى جەكپە-جەگىندە چەمپيوندىق تيتۋل ءۇشىن ايقاسادى. وسى جەكپە-جەگىندە دومينيكاندىق حۋان كارلوس پايونومەن جۇدىرىقتاسىپ، وكىنىشكە قاراي، تارتىستى كەزدەسۋدە روۋشي جەڭىلىس تابادى. جەڭىسكە جەتكەن قارسىلاسى WBA جانە IBO بەلبەۋلەرىنىڭ يەگەرى اتانادى. ءبىراق، اراعا ءبىر جىل سالىپ، قوس بوكسشى قارىمتا كەزدەسۋ وتكىزىپ، امەريكالىق قارسىلاسىنان كەتكەن ەسەسى مەن بەلدىكتەردى وزىنە قايتارىپ الادى.
ال ءبىزدىڭ جاقيانوۆ بىردە-ءبىر وليمپيادا ويىندارىنا قاتىسىپ كورمەپتى. جاقيانوۆ 2015-جىلى كاسىپقوي بوكستا WBA نۇسقاسى بويىنشا جەڭىل سالماقتاعى ۋاقىتشا الەم چەمپيونى اتاعىن جەڭىپ الدى. ول بۇل اتاققا مونتە-كارلودا وتكەن 12 راۋندتىق جەكپە-جەكتە قول جەتكىزدى. قارسىلاسى WBA (nterim) تۇجىرىمى بويىنشا الەم چەمپيونى ۆەنەسۋەلالىق يونفرەس پارەحون (17-1-1, 8 ك و) بولاتىن. سونداي-اق، ول وسى جىلى WBC تۇجىرىمىنىڭ جاڭارتىلعان رەيتينگىندە تايلاند تارلانبوزى سۋريان سور رۋنگۆيسايدى باسىپ وزىپ، بۇكىل الەمدىك بوكس كەڭەسى (WBC) تۇجىرىمى بويىنشا الەم چەمپيونى اتاعىنا تالاسۋدان ۇمىتكەرلەر اراسىندا ءبىرىنشى ورىنعا شىقتى.
مۇنىڭ ءوزى قازاق بوكسشىسىنىڭ كاسىپقوي بوكس الەمىندەگى ورنىن ايقىنداي ءتۇستى. سونىمەن قاتار 2015-جىلى جەرلەسىمىز ءساۋىر ايىنىڭ سوڭىندا EBU تۇجىرىمى بويىنشا جەڭىل سالماقتا (53,5 كەلىگە دەيىنگى) ەۋروپا چەمپيونى اتاعىن دا جەڭىپ العان بولاتىن. وسى چەمپيوندىق اتاق ءۇشىن وتكەن جەكپە-جەكتە قازاقستان بوكسشىسى فرانسۋز كاريم گۋەرفيدى نوكاۋتقا تۇسىرگەن. ZZ لاقاپ اتىمەن ونەر كورسەتىپ جۇرگەن جەرلەسىمىز جەڭىل سالماقتا WBC Eurasia Pacific Boxing Council اتاعىن جەڭىپ العان. جانات كاسىپقوي بوكسقا 2007-جىلى بەت بۇرعان بولاتىن. سودان قازىرگى ۋاقىتقا دەيىن 26 كەزدەسۋ وتكىزىپ، 25 رەت جەڭىسكە قول جەتكىزدى. ونىڭ 18 ءىن مەرزىمىنەن بۇرىن اياقتادى.
الايدا 2015-جىلدىڭ سوڭىندا ازداپ جاراقات العان ول جىلدان استام ۋاقىت ەمدەلىپ، بۇگىن ۇزاق ۇزىلىستەن كەيىنگى العاشقى جەكپە-جەگىندە ساتتىلىك جولداس بولىپ، قارسىلاسىنان ەكى بىردەي تيتۋىلدىق اتاقتى تارتىپ الدى. مىنە، وسىلايشا جاقيانوۆ كاسىپقوي بوكستاعى گولوۆكيننەن كەيىنگى ەكىنشى چەمپيونىمىز بولدى. الداعى ۋاقىتتاردا دا ايقاستارى تابىستى بولا بەرسىن دەپ تىلەيىك.
اۆتور: كۇنسۇلتان وتارباي
