ەلباسىنىڭ ءوزى «مافيا» دەپ اتاعان كومپانيانىڭ بىلىقتارى اشىلا باستادى

استانا. قازاقپارات - پرەزيدەنتتىڭ ءوزى «مافيا» دەپ اتاعان «س ق- فارماتسيا» كومپانياسىنداعى بىلىقتار اشىلا باستادى.

وسى ۋاقىتقا دەيىن ءتىس جارماعان تەكسەرۋشى كوميتەت بۇگىن ءىرى كومپانياعا 1 ميللياردتان استام ايىپپۇل سالعانىن جاريالادى دەپ حابارلايدى 31- ارنا.

ءدارى ساتىپ الۋمەن اينالىساتىن ءىرى فيرما بەس جىل بويى پرەپاراتتاردى تاسىمالداۋ مەن ساتۋدى ءبىر عانا لوتپەن جۇرگىزىپ، زاڭدى بەلشەسىنەن باسقان. نازاربايەۆتىڭ «فارماتسيەۆتيكا سالاسىن مايشەلپەككە اينالدىرعانداردى قۋىڭدار» دەگەن بۇيرىعىنان كەيىن «س ق- فارماتسيەۆتىڭ» ءتوراعاسى ءوز ەركىمەن وتستاۆكاعا كەتكەنىن دە ايتا كەتۋ كەرەك.

ءومىرزاق شۇكەيەۆ قۇتىلدىم دەپ قۋانىپ وتىرعان فارماتسيەۆتيكا سالاسىنداعى بىلىقتار تۋرالى وتكەن اپتادا وتكەن ۇكىمەت وتىرىسىندا پرەزيدەنتتىڭ ءوزى ءتىزىپ بەرگەن بولاتىن.

نازاربايەۆ مەملەكەت بولەتىن اقشاعا ءدارى-دارمەك ساتىپ الىپ، تاراتۋمەن اينالىساتىن «س ق- فارماتسيا» كومپانياسىن مايشەلپەككە اينالدىرىپ، وتاندىق فارماتسيانى دامىتقىسى كەلمەي وتىرعانداردى ءتىپتى «مافيا» دەپ اتاعان ەدى.

پرەزيدەنتتىڭ ايتۋىنشا، شەتەلدىك دارىلەرگە تاپسىرىس بەرىپ، پايداعا باتىپ وتىرعاندار فابريكا سالۋدى سۇراعان كاسىپكەرلەردى ماڭدارىنا جۋىتپايدى. نازاربايەۆ جاڭا تاعايىندالعان دەنساۋلىق ساقتاۋ ءمينيسترى ەلجان ءبىرتانوۆقا ەسكەرتۋ جاساپ، جىلدار بويى مىزعىماي وتىرىپ، ءدارى-دارمەكتىڭ قۇلاعىنان مىقتاپ ۇستاپ العانداردى تۇگەلدەي قۋۋدى قاداپ تاپسىرعان.

وسى ۋاقىتقا دەيىن ءتىس جارماعان تابيعي مونوپوليالاردى رەتتەۋ كوميتەتىنىڭ وكىلدەرى كومپانياداعى 2011-جىلدان بەرگى بىلىقتاردى بۇگىن جاريالادى. پرەزيدەنتتىڭ پارمەنىنەن كەيىن عانا «س ق- فارماتسيا» فيرماسىنا بەس جىل بويى ءدارى-دارمەكتى ساتىپ الۋ مەن تاسىمالداۋدى ءبىر لوتپەن جۇرگىزەنى ءۇشىن 1 ميلليارد 300 مىڭ تەڭگە ايىپپۇل سالىنعانىن ايتتى.