چاليمبەكوۆا - قول كۇرەسپەن اينالىسقانىمدى انام بىلمەيدى

استانا. قازاقپارات - ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا جانە الەم تىلدەرى فاكۋلتەتىنىڭ تۇلەگى، قازاقستانداعى قول كۇرەس سپورت ءتۇرى بويىنشا ۇزدىك وندىققا كىرەتىن سپورت شەبەرىنە ۇمىتكەر مارفۋعا چاليمبەكوۆامەن بولعان سۇحباتتى وقي وتىرىڭىزدار.

-  ارمرەستلينگ ياعني قول كۇرەس سپورت تۇرىنە قالاي كەلدىڭىز؟

-  ۇيدە انام ەكەۋىمىز عانا بولعاننان كەيىن ەر بالا سەكىلدى بولىپ ءوستىم. ارينە، سىنىبىمدا جيىرما ۇل مەن التى قىز بولعانى دا بار. تىنىمسىز بولدىم، توبەلەسىپ جۇرەتىن ەدىم. مەكتەپتىڭ سپورت زالىنان شىقپايتىنمىن، انام ۇرسىپ جۇرەتىن. سودان بولار، شىمىر بولىپ ءوستىم. قاز ۇ ۋ- عا تۇسكەن كەزىمدە ارمرەستلينگ (قول كۇرەس) دەگەن سپورت ءتۇرىنىڭ بارىن بىلمەيتىنمىن... جاڭا مەكەنگە ەندى ۇيرەنىسىپ، العاشقى سەمەستر اياقتالعان كەز بولاتىن. اۋديتوريادا بۇكىل توپتىق لەكتسيانى كۇتىپ وتىرعانىمدا، توپ باسشىمىز كەلىپ "وسىنداي دا وسىنداي، مەنىڭ توبىمداعى ءمولدىر دەگەن قىز قىسقى ۋنيۆەرسيتەت ارالىق ۋنيۆەرسياداعا بارايىن دەپ جاتىر. سالماعى سەنىمەن قاتارلاس، ەكەۋىڭ كۇش سالىستىرىپ كورىڭدەرشى"- دەدى. سويتسەم توپتاعى ءبىراز قىزبەن جارىسىپ كەلىپ وتىرعان ەكەن. كۇرەستىك! جەڭگەن، جەڭىلگەنىم ەسىمدە جوق. ءمولدىر قاسىنا شاقىردى، اعايعا اپارىپ كورسەتەم دەپ. باسىندا بارماي ءجۇردىم، ول كەزدە مەن ۆولەيبولدىڭ جانكۇيەرى ەدىم. قازىر دە سوندايمىن! نە كەرەك، قىزىعۋشىلىق باسىپ، مولدىرگە ەرىپ باردىم. وسى سپورت تۇرىمەن تانىستىعىم وسىلاي باستالعان.

-  اناڭىزدىڭ كوزقاراسى قانداي ەدى؟ "قىز بالاسىنا جاراسپايدى" دەگەن سىندى ءسوز بولدى ما؟!

-  انام ول كەزدە بىلگەن جوق. قازىر دە بىلمەيدى... قارسى بولاتىنىن ءبىلدىم، سول ءۇشىن ايتپادىم. "قىز بالاعا جاراسپايدى" دەگەندى ءجيى ەستيمىن دەپ ايتا المايمىن، ءبىراق كۇلە قاراۋشىلار وتە كوپ. سەنبەيتىندەردىڭ سانى دا بارشىلىق. مەنىڭ تۇرىمە ەمەس، دەنەمە قاراپ سەنبەيتىندەرىن ايتادى. وعان ۇيرەنىپ كەتتىم، ونداي كەزدە ءسوزدى ىسپەن دالەلدەيسىڭ!

-  قازاقستاندا سپورتتىڭ بۇل ءتۇرى قانشالىقتى دەڭگەيدە دامىعان؟

-  قازاقستاندا بۇل سپورتتىڭ ءتۇرى كەنجەلەپ كەتكەن. قولداۋشىلار مەن قاتىسۋشىلار سانىنىڭ ازدىعىنان بولار. مەن ءوزىمدى "شىنايى فاناتىمىن" دەپ ەسەپتەمەيمىن. ءبىراق جىل بويىنا كوپ جارىس وتەدى. ەكى جىلدا ۋنيۆەرسيتەت ارالىق قىسقى ۋنيۆەرسيادالار بولىپ تۇرادى. قازاقستاندا شاردارا مەن شىعىس قازاقستان، تاراز قالالارىندا جاقسى دامىعان. ەلدىڭ نامىسىن قورعاپ جۇرگەن قىزداردىڭ بارلىعى دا - وسى ايماقتىڭ تۋمالارى. قازاقستان 1990 -جىلى ەڭ العاش رەت ماسكەۋدە وتكەن الەمدىك جارىسقا قاتىستى. سودان بەرى جوعارىلاپ كەلەمىز. شاردارانىڭ قىزدارى برازيلياعا بارىپ، التىننان القا تاققان. باسقا سپورت تۇرلەرىمەن سالىستىرعاندا وگەي بالا سەكىلدى. قولداۋ كەرەك.

-  العاشقى جەتىستىگىڭىز تۋرالى ايتىپ بەرسەڭىز؟

-  العاشقى جەڭىسىم ءارى جەتىستىگىم الماتى قالاسىندا وتكەن جارىستا، 2012 -جىلى بولدى. ەكىنشى ورىن الدىم، ۇلكەن اپايدان (جاسى الپىستان اسقان) جەڭىلگەنمىن. ودان كەيىن IV قىسقى ۋنيۆەرسياداعا بارىپ ءبىرىنشى ورىن الدىم. ءوزىم ون ءتورت وبلىستىڭ ۋنيۆەرسيتەتتەرىنەن كەلگەن ستۋدەنتتەردى باسىپ وزعانىما سەنگەن جوقپىن. ەڭ جوعارعى جەتىستىگىم -  قازاقستانعا شىققانىم. ول جارىس قالاارالىق جارىستاردان مۇلدەم بولەك. ەلدىڭ نامىسىن ارمرەستلينگتەن قورعايتىن، قۇراماعا الىناتىن جاستاردى سارالايدى. سوندا ۇزدىك وندىققا ەندىم. التىنشى ورىن الدىم (50 ك گ سالماق دارەجەسىنە دەيىن).

-  قازاقستان بويىنشا اتالعان سپورت تۇرىنەن 6-ورىندا تۇرسىز. بۇل - ۇلكەن جەتىستىك. دەگەنمەن العاشقى بەستىكتىڭ سىزدەن ەرەكشەلىگى نەدە بولىپ تۇر؟

-  ءيا، قاراپايىم ادام ءۇشىن ۇلكەن جەتىستىك. مەنىڭ ماماندىعىم -  فيلولوگ. ال ول جەردەگى قىزداردىڭ بارلىعى - سپورتتا جۇرگەندەر. اتالعان سپورت تۇرىمەن تىنباي اينالىسىپ، جوعارى جەتىستىكتەرگە جەتسەم ەكەن دەگەندەر. مەنىكى تەك سىرتتاي اۋەسقويلىق قانا. ولار كۇنىنە دايىندىق جاسايدى، ارنايى جاتتىقتىرۋشىلارى بار. مەن ۋنيۆەرسيتەتتە ساباق بەرەتىن ۇستازىممەن عانا جاتتىقتىم. ءبىراق بۇل - مەن ءۇشىن ۇلكەن ابىروي دەپ بىلەمىن.

-  ءوزىڭىز شەت ەلدىك جانە ءبىزدىڭ ەلدىڭ اتالعان سپورت تۇرىنەن كىمدەردى ۇلگى تۇتار ەدىڭىز نەمەسە مىقتى دەپ كىمدەردى باعالار ەدىڭىز؟

-  گۋنكو ەۆگەنيا - قازاقستاننىڭ نامىسىن قورعاپ جۇرگەن قىز. مەنىڭ سالماعىمدا ءابسوليۋتتى چەمپيون بولدى. ال ۇلدار اراسىنداعى ارمسپورت قىزداردىكىنەن بولەك. سوندىقتان بەلگىلى ءبىر ادامدى اتاي المايمىن. ۇلدارعا تازا كۇش كەرەك، ال قىزدار اراسىندا تەك كۇشپەن جەڭە المايسىڭ. تاكتيكا، جىلدامدىق كەرەك. مەندە كۇش باسىم ەمەس، تاكتيكاعا سالام نەمەسە جىلدامدىقپەن جەڭگەن كەزدەرىم كوپ. بىلەك پەن بۋىن مىقتى بولۋ كەرەك، سوندا ەش نارسەدەن قورىقپاۋىڭا بولادى.

-  قازىر بۇل سپورت تۇرىمەن ءالى دە بولسىن شۇعىلداناسىز با؟ بولاشاق ارمان- ماقساتتارىڭىز قانداي؟

-  وكىنىشكە وراي، جوق. سپورت زالعا بارماعانىما ەكى جىلدان استى. كەي كەزدەرى ساعىنام، سوندا دا بارمايمىن. قىز بالانىڭ مۇراتى - جار بولۋ، انا بولۋ. جاس كەزىمدەگى جاعىمدى سىيلارعا تولى ەستەلىكتەرىمنىڭ ءبىر بولىگى بولىپ قالعانىن قالايمىن.

سۇحباتىڭىزعا راقمەت!

سۇحباتتاسقان: مارعۇلان اقان

 massaget.kz