اۋىل تۇرعىنى وبلىس اكىمى نوعايەۆقا ءوز قولىمەن جاساعان دومبىراسىن سىيلادى - فوتو
ايتا كەتەلىك، وبلىس اكىمى بۇگىن، 10 -اقپاندا ماحامبەت اۋدانى اكىمىنىڭ تۇرعىندارعا بەرگەن جىلدىق ەسەبىنە قاتىسىپ، اتقارىلعان جۇمىستارمەن تانىسىپ جاتىر، دەپ حابارلايدى قازاقپارات. ەسەپ بەرۋ جيىنى باستالماس بۇرىن ايماق باسشىسى جەرگىلىكتى كاسىپكەرلەرمەن كەزدەسىپ، تىلدەستى.
اكىممەن كەزدەسۋگە ەشكى ءسۇتىن وڭدەپ ساتاتىن زاۋىتتىڭ باسشىسى، سيىر فەرماسىنىڭ، ۇلتتىق كيىمدەر تىگەتىن سەحتىڭ، اعاش وڭدەۋمەن اينالىساتىن كاسىپورىننىڭ نەگىزىن قالاۋشىلارى كەلدى. وبلىس اكىمىنە بيزنەسىن تانىستىرعان دومبىرا جاساۋ سەحىنىڭ باسشىسى نۇرلىبەك بيسەنبايەۆ 2015 -جىلى «اۋىلدىق جەردەگى شاعىن جانە ورتا بيزنەستى قولداۋ» باعدارلاماسى اياسىندا 4 ميلليون تەڭگە نەسيە العانىن ايتتى.
بۇل قارجىعا ول دومبىرا جاساۋعا قاجەتتى قۇرالدار ساتىپ الىپ، سەح ورناتىپ، ونىڭ جانىنان ونىمدەرىن ساتاتىن دۇكەن ۇيىمداستىرعان. كاسىپكەر دومبىرالارىن نەگىزىنەن قارا اعاشتان، جيدەك اعاشىنان جانە قىزىل اعاشتان جاسايتىنىن جەتكىزدى. ونىڭ ايتۋىنشا، كاسىبىن دوڭگەلەتىپ كەتۋگە مەملەكەت تاراپىنان كورسەتىلگەن قولداۋدىڭ كومەگى كوپ بولعان. ونىمدەرىن تانىستىرىپ بولعان سوڭ دومبىرا شەبەرى ايماق باسشىسى نۇرلان نوعايەۆقا جيدەك اعاشىنان جاساعان ۇكىلى دومبىرانى سىيعا تارتتى.
وبلىس اكىمى قولىنان ءىس كەلەتىن دارىنداردىڭ اۋىلدان كوپ شىعاتىنىن، ولاردى قولداپ- قولپاشتاۋ مەملەكەتتىڭ مىندەتى ەكەنىن، ايماقتاعى كاسىپكەرلەردىڭ كوبەيە ءتۇسۋى ءۇشىن جۇمىستى توقتاتپايتىنىن ايتتى. ول اتقارىلعان جۇمىستاردىڭ ەلباسى ساياساتىنىڭ جەمىسى ەكەندىگىن نىقتاپ ايتتى.
ايتا كەتەلىك، اۋدانعا ساپارى بارىسىندا نۇرلان نوعايەۆ كوشپەلى كەڭەس وتكىزىپ، وبلىستاعى جايىلىمدىق جەرلەر مەن ەگىستىكتەردى سۋلاندىرۋ تۋراسىنداعى تۇيتكىلدى ماسەلەلەردى تالقىلاپ، وسى باعىتتا قاراماعىنداعىلارعا ناقتى تاپسىرمالار بەردى. ول، سونىمەن قاتار، بىلتىر اۋدانعا كەلگەندە بەرگەن تاپسىرمالارىنىڭ ورىندالۋ بارىسىن تالقىلادى. اۋدان اكىمى بەرىلگەن 38 تاپسىرمانىڭ ون توعىزى ورىندالىپ، ون ءبىر تاپسىرما ورىندالۋ ۇستىندە ەكەندىگىن، سەگىزىنىڭ ورىندالماعانىن ايتتى.
