قازاقستان كارتوپتارى دەپ جۇرگەنىمىز شىن مانىندە پاكىستاندىكى ەكەن

استانا. قازاقپارات - «اتامەكەن» ۇلتتىق كاسىپكەرلىك پالاتاسى باسقارما باسشىسىنىڭ ورىنباسارى نۇرجان التايەۆتىڭ ايتۋىنشا، سوڭعى بەس جىل بويى قازاقستان ميلليونداعان توننا كارتوپتى سىرتتان ساتىپ الىپ كەلەدى.

جىل سايىن اتالعان ءونىمنىڭ جالپى سوماسى 16 ميلليون دوللاردى قۇرايدى، دەپ حابارلايدى قازاقپارات ءتىلشىسى. «الايدا ءبىز ءوزىمىز ىشكى سۇرانىستان ارتىق كارتوپتى ءوندىرىپ وتىرامىز. ءسويتىپ، قازاقستان بويىنشا شامامەن 3 ميلليارد دوللاردىڭ كوكونىس ونىمدەرىن سىرتتان ساتىپ الىپ وتىرامىز. سونىڭ ىشىندە 2 ميلليارد تەڭگەنىڭ ءونىمىن ءوزىمىز-اق شىعارا الامىز»، - دەدى التايەۆ استانا قالاسى كاسىپكەرلەرىنىڭ جىل سايىنعى كونفەرەنسياسىندا.

ونىڭ ايتۋىنشا، بۇگىندە بازاردا وتاندىق ءونىم دەپ ساتىلاتىن كارتوپتىڭ باسىم بولىگى - سىرتتان كەلگەن. الايدا ساتۋشىلار ونى اشىق ايتپايدى. «قىس كەزىندە ءبىز كارتوپتى پاكىستاننان تاسيمىز. قازىرگى كەزدە ونى «ماكينسك» پەن «پاۆلوداردىڭ» كارتوبى دەپ جاپپاي ساتىپ جاتىر. شىن مانىندە، ونىڭ ءبارىن سىرتتان اكەلەدى»، - دەپ اتاپ كورسەتتى «اتامەكەن» باسشىسىنىڭ ورىنباسارى.

ايتا كەتەيىك، بۇگىنگى جيىن بارىسىندا يسەكەشەۆ ازىق-تۇلىك دۇكەندەرى مەن ءدارىحانالارى از جەرلەردە ونداي بيزنەستى اشۋعا نيەت تانىتقان كاسىپكەرلەرگە جەڭىلدىك جاساۋعا دايىن ەكەنىن جەتكىزدى. سونداي-اق استانا اكىمى ەكسپو كەزىندە تاماق ماسەلەسىن قالاي شەشەتىنىن ايتىپ بەردى.

اۆتور: ارمان اسقاروۆ