نۇرسۇلتان نازاربايەۆتىڭ ءرولىن كونستيتۋتسيادا بەكىتۋ ۇسىنىلۋدا
بۇل تۋرالى مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى جۇمىس توبىنىڭ ءۇشىنشى وتىرىسىنان كەيىن قازاق گۋمانيتارلىق زاڭ ۋنيۆەرسيتەتى ازاماتتىق-قۇقىقتىق زەرتتەۋلەر عىلىمي-زەرتتەۋ ينستيتۋتىنىڭ ديرەكتورى تولەش قاۋدىروۆ ايتتى، دەپ حابارلايدى قازاقپارات.
«كونستيتۋتسيالىق رەفورمانىڭ ءوزى قوعام اراسىندا زور سىلكىنىس تۋدىردى. كوميسسيا ءوز ۇسىنىسىن جىبەرگەن ازاماتتاردىڭ بارلىعىنا ريزاشىلىعىن بىلدىرەدى. رەفورما باسقا دا جولمەن جۇرگىزىلىپ جاتقاندىعىن ەستە ۇستاۋ ماڭىزدى. بۇل تەك قانا كونستيتۋتسيالىق وزگەرىستەر عانا ەمەس. ءبىز 45 تەن 39 وكىلەتتىكتى ۇكىمەت پەن پارلامەنتكە بەرەتىندىگىن ساناپ شىقتىق. ءوز ەركىمەن 39 وكىلەتتىكتى ەش قيىندىقسىز اتقارۋشى بيلىككە بەرە سالۋ الەمدىك وقيعا ەكەندىگىن اتاپ وتكىم كەلەدى. جۇمىس ءجۇرىپ جاتىر، زاڭ جوباسى ازىرلەنۋدە. ول ايدىڭ سوڭىنا دەيىن پارلامەنتكە ەنگىزىلۋى ءتيىس»، - دەدى قاۋدىروۆ.
ونىڭ ايتۋىنشا، ەل ازاماتتارىنان كەلىپ تۇسكەن ۇسىنىستار سان الۋان. «تۇڭعىشى پرەزيدەنت نۇرسۇلتان نازاربايەۆتىڭ ءرولىن كونستيتۋتسيا ماتىنىندە بەكىتۋ تۋرالى دا ۇسىنىس بولدى. ءتىپتى، ول وكىلەتتىكتەرىنىڭ باسىم كوپشىلىگىن بەرىپ وتىرعان جوق پا دەگەن الاڭداۋشىلىق تا بولدى. ۇسىنىستار سايلاۋدان باستاپ بيلىكتىڭ جوعارى تارماقتارى وكىلەتتىكتەرىنە دەيىنگى ءبىزدىڭ قوعامدىق-ساياسي ءومىرىمىزىڭ سان الۋان بولىكتەرىن قامتيدى»، - دەدى ول.
ونىڭ سوزىنە قاراعاندا، زاڭ جوباسىنا قاتىستى شەشىم ءالى قابىلدانعان جوق. «ول ازىرلەۋ جانە تالقىلاۋ ساتىسىندا تۇر. بۇل زاڭ جوباسىن جاقسارتا تۇسەتىن بارىنشا قۇندى ۇسىنىستار مىندەتتى تۇردە ەسكەرىلەدى»، - دەدى تولەش قاۋدىروۆ.
ايتا كەتەيىك، بۇعان دەيىن ساياسي رەفورمالار جونىندەگى جۇمىس توبىنا 500 دەن استام ۇسىنىس تۇسكەنىن حابارلاعان بولاتىنبىز.
اۆتور: مارلان جيەمباي
