07:21, 10 - اقپان 2017 | GMT +5
ايگىلى فۋتبولشى مازاسىز كورشىسىنىڭ ءۇيىن ساتىپ الدى
استانا. قازاقپارات - ايگىلى فۋتبولشى ليونەل مەسسي مازا بەرمەگەن كورشىسىنىڭ ءۇيىن ساتىپ الدى.
بۇل تۋرالى فۋتبولشىنىڭ كوماندالاسى يۆان راكيتيچ «L'Equipe» باسىلىمىنا بەرگەن سۇحباتىندا ايتا كەتتى، دەپ جازادى massaget.kz.
- مەسسي بارسەلونا ماڭىنداعى كاستەلدەفەلسەدەن ءۇي العاندا كورشىسى جايسىز بولدى. جيى شۋلايتىن بولعاندىقتان، مەسسي مەن انتونەللا جاندارىنىڭ تىنىشتىعى ءۇشىن كورشىسىنىڭ ءۇيىن ساتىپ الىپ تىندى، - دەدى راكيتيچ.
ايتا كەتەيىك، 29 جاستاعى فۋتبولشى كاتالوندىق كلۋبپەن جاقىن ارادا جاڭا كەلىسىم-شارتقا قول قوياتىن بولادى. ول كەلىسىم-شارت نەگىزى بويىنشا فۋتبولشى الەمدەگى ەڭ كوپ جالاقى الاتىن ويىنشى اتانۋى مۇمكىن. سونداي-اق الەمنىڭ ۇزدىك فۋتبولشىسى سپورتتىق مانسابىنىڭ سوڭىنا دەيىن «بارسەلونادا» ويناۋعا دا ءوز كەلىسىمىن بەرمەك.
