ديماش قىتاي جۇلدىزدارىنىڭ رەيتينگىندە كوش باستاپ تۇر

استانا. قازاقپارات - قىتايدا  ءان بايقاۋىنا قاتىسىپ، كەڭ تانىمالدىلىققا يە بولعان ديماش قۇدايبەرگەن قىتاي جۇلدىزدارىنىڭ اپتالىق رەيتينگىندە كوش باستاپ تۇر.

بۇل تۋرالى ءانشىنىڭ PR- مەنەدجەرى الپامىس شاريموۆ حابارلادى. «ءار اپتا سايىن قىتايدا تەك انشىلەردىڭ ەمەس، اكتەر، جۇرگىزۋشى، شوۋمەن سىندى ايتۋلى جۇلدىزداردىڭ تانىمالدىلىق رەيتينگىسى جاريالانادى. وندا عالامتوردا ەسىمدەرىنىڭ كوپ پايدالانىلۋى، ىزدەۋ كورسەتكىشى، ءارتىستىڭ ۆيدەولارىنىڭ كورسەتىلىمى، تەلەارناداعى رەيتينگى ت. ب ەسەپكە الىنىپ، اپتالىق رەيتينگ جاسالادى»، - دەپ جازدى ول.

قازاقستاندىق ديماش قۇدايبەرگەن 2989 ۇپاي جيناپ، باسەكەلەستەرىنەن وق بويى وزىپ شىقتى. ول بۇل رەيتينگتى قاتارىنان ەكىنشى اپتا بويى باستاپ تۇر.

ەسكە سالا كەتسەك، ديماش ءان بايقاۋىنىڭ ءتورت كەزەڭىنە قاتىسىپ، فرانسۋز، ورىس، قىتاي تىلدەرىندە ءان شىرقادى. سايىس ءساۋىر ايىنا دەيىن جالعاسادى. ازىرگە، جالپى ەسەپ بويىنشا، وتانداسىمىز ءبىرىنشى ورىندا كەلەدى.

اۆتور: ايجان سەرىكجان قىزى