ساپاربايەۆ ءدارىحانالارداعى شارىقتاعان باعالاردى رەتتەۋدى تاپسىردى
وسى كۇندەرى اقتوبە وبلىسىنىڭ اكىمى بەردىبەك ساپاربايەۆ بارلىق باسقارما باسشىلارىنان ەسەپ الۋدا. جىلدى قورىتىندىلاپ، جۇمىسىنىڭ ناتيجەسىن كورسەتكەن باسقارما باسشىلارى كوپ جاعدايدا كابينەتتەن شىقپاي، قۇر ساندىق كورسەتكىشكە سۇيەنەتىنىن كورسەتىپ وتىر.
بۇل جولى قر دەنساۋلىق ساقتاۋ مينيسترلىگى مەديتسينالىق جانە فارماتسيەۆتيكالىق قىزمەتتى باقىلاۋ كوميتەتى اقتوبە وبلىسى بويىنشا دەپارتامەنتىنىڭ باسشىسى قايرات سابىر ەسەپ بەردى. جيىنعا باعاعا مىعىم، ءدارى- دارمەكتىڭ قۇنىن ۇنەمى سالىستىرىپ جۇرەتىن ارداگەرلەر دە قاتىستىرىلدى.
«ماماندارعا تاپسىرما بەرىپ، اقتوبە قالاسىنداعى 10 عا جۋىق ءدارىحانانى تەكسەرتتىم. ەشقايسىسىندا پايىزدىق جەڭىلدىك جوق. العا، شالقار، قوبدا، ويىل اۋداندارىنداعى ءدارىحانالاردا دا وسى جاعداي. جەڭىلدىك مۇلدە قاراستىرىلماعان. 30 پايىز جەڭىلدىك قايدا؟ ناقتى جاعدايدى ءبىلۋ ءۇشىن ءدارىحانالاردى ارالاپ، كوزبەن كورۋ كەرەك. دارىلىك زاتتاردىڭ باعاسىن وسىرمەۋ تۋرالى مەموراندۋمعا قول قويىلدى. ناتيجەسى قايدا؟»، - دەدى بەردىبەك ساپاربايەۆ.
ءوڭىر باسشىسىنىڭ ايتۋىنشا، 6 -اقپان كۇنى اكىمدىك اپپاراتىنىڭ ماماندارى العا، شالقار، قوبدا، ويىل اۋداندارىنا مونيتورينگ جۇرگىزگەن. ناتيجەسىندە، ءبىرقاتار دارىلىك زاتتاردىڭ باعاسى ءوز قۇنىنان جوعارى ساتىلعانى انىقتالدى. «ماسەلەن، 100 ميلليگرام دولانانىڭ كەلىسىلگەن باعاسى - 95 تەڭگە. ال ءدارىحانادا 255 تەڭگەدەن ساتىلىپ جاتىر. بۇل يمپورت ەمەس قوي، نەگە قىمبات؟ 100 ميلليگرامدىق ميا تامىرىنىڭ شىرىنى 250 تەڭگەدەن ساتىلۋى ءتيىس. ءبىراق ول 350 تەڭگەدەن ساتىلۋدا. قاراپايىم دارىلەردىڭ باعاسى وسىنداي، باسقاسىن ايتۋ قيىن»، - دەدى ول.
اقتوبە وبلىسى اكىمىنىڭ بۇل سىنىن ارداگەرلەر دە راستادى. قاريا كەڭەس ءبىرمانوۆتىڭ ايتۋىنشا، اۋىل تۇرعىندارى تەگىن بەرىلەتىن ءدارى- دارمەكتەردىڭ ءتىزىمىن بىلمەيدى. ال ەمحانا باسشىلىعى مەن ەمدەۋشى دارىگەرلەر تەگىن كومەك تۋرالى اقپاراتتى جاسىرىپ قالادى.
ايتا كەتەيىك، وبلىستا مەديتسينالىق جانە فارماتسيەۆتيكالىق بۇيىمداردى ساتۋمەن جانە تاراتۋمەن اينالىساتىن 601 مەكەمە بار، ونىڭ 386 سى ءدارىحانا (271 ى اقتوبە قالاسىندا، 97 سى اۋدانداردا ورنالاسقان).
