اقتوبەلىكتەر قالا اكىمىمەن جىلاپ كورىستى - كەسكىن
ونىڭ ايتۋىنشا، بۇگىنگى كۇنى جاستار كۇندىز-ءتۇنى اقشا سالىپ، قۇمار ويىنعا سالىنىپ كەلەدى، دەپ حابارلايدى قازاقپارات ءتىلشىسى. اقتوبە قالاسىنىڭ اكىمى ءىلياس يسپانوۆ بۇگىن ءبولىم باسشىلارىن جيناپ، تاحاۋي احتانوۆ اتىنداعى دراما تەاتر ىشىندە قوعامدىق قابىلداۋ وتكىزدى. قابىلداۋ جونىندە حالىققا الدىن الا حابارلانىپ، كەزدەسۋ ورنى مەن ۋاقىتى بەلگىلەنگەن سوڭ، جەر مەن ءۇي، زەينەتاقى مەن جاردەماقى جايىن ايتۋعا كەلگەن جۇرتتىڭ قاراسى كوپ بولدى. ال اقتوبەلىك انا باسشىلاردىڭ الدىنا كەلىپ، جىلاپ جىبەردى. ول بۋكمەكەرلىك كەڭسەلەردى جابۋدى سۇرادى.
«سىزدەر كوپ ماسەلەنى شەشىپ جاتىرسىزدار، ءبىراق بۋكمەكەرلىك كەڭسەلەردى جابۋ كەرەك. جاستاردىڭ ءبارى سول جاقتا وتىرادى»، - دەدى اشىنعان انا.
انانىڭ جان ايقايىن ەستىگەن قالا اكىمى ءىلياس يسپانوۆ زاڭدى تۇردە جۇمىس ىستەپ تۇرعان بۋكمەكەرلىك كەڭسەلەردى جابۋ قولدان كەلمەيتىن جۇمىس ەكەندىگىن ايتتى. «بۋكمەكەرلىك كەڭسەلەر ماسەلەسى ءبىر مەزەتتە شەشىلمەيدى. ولار زاڭ اياسىندا اشىلعان. قىلمىسى اشكەرەلەنىپ، الاياقتىق جاساعاندارى انىقتالاتىن بولسا، پوليتسيا قىزمەتكەرى شەشەدى»، - دەدى ءىلياس يسپانوۆ.
قالا اكىمى الداعى ۋاقىتتا ءبىر كۇندى قوعامدىق قابىلداۋلارعا ارناۋدى ءجون كورىپ وتىر. جوسپار بويىنشا، ەرتەڭ ول حالىق الدىندا سوڭعى ەسەبىن بەرۋى ءتيىس ەدى. ءبىراق تۇرعىنداردىڭ سۇراعى كوپ بولعاندىقتان، ەسەپ دۇيسەنبىگە شەگەرىلدى.
