قازاقستاننىڭ سولتۇستىك وڭىرلەرىنە قونىس اۋداراتىندارعا قاجەتتى جاعداي جاسالادى

استانا. قازاقپارات - ۇكىمەت ەلىمىزدىڭ وڭتۇستىگىنەن سولتۇستىك وڭىرلەرگە قونىس اۋدارعاندارعا باسپانا سالۋدان باس تارتتى.

بۇل تۋرالى استانادا وتكەن باسپا ءسوز ءماسليحاتىندا ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى ءبىرجان نۇرىمبەتوۆ ءمالىم ەتتى، دەپ حابارلايدى قازاقپارات.

«ءبىز ءوز ەركىمەن قونىس اۋداراتىنداردى ىنتالاندىرۋدى جالعاستىرامىز. ءبىزدىڭ باعدارلامادا ەڭبەك كۇشى ارتىق وبلىستاردان ەڭبەك كۇشىنەن تاپشىلىق كورىپ وتىرعان وڭىرلەرگە قونىس اۋدارۋعا ەكپىن قويىلعان»، - دەدى نۇرىمبەتوۆ.

سوڭعى 10 جىلداعى كوشى-قون ۇردىسىنە تالداۋ جاسالعانىنا توقتالعان ول، بۇل رەتتە قونىس اۋدارۋعا ىنتالاندىرۋدى قاجەت ەتەتىن وبلىستار ايقىندالعانىن جەتكىزدى. اتاپ ايتقاندا، وڭتۇستىك قازاقستان، جامبىل، الماتى جانە ماڭعىستاۋ وبلىستارىنان جۇمىس كۇشى تاپشى پاۆلودار، شىعىس قازاقستان، سولتۇستىك قازاقستان، قوستاناي وبلىستارىنا قونىس اۋدارۋعا نيەتتى ادامدارعا مەملەكەت قولداۋ جاسادى.

«وسى باعىتتا ءبىر جاڭاشىلدىق بار. ەندى باسپانا سالمايمىز. سەبەبى، جالپى مەملەكەت، ۇكىمەت تۇرعىن ءۇي ساياساتىندا باسقاشا قادامدى بەكىتتى. ەلدەگى بارشا باسپانا «بايتەرەك» جەلىسى بويىنشا بولۋى كەرەك. ازاماتتار ءۇشىن ارەندالىق باسپانا سالىنىپ جاتىر»، - دەپ توقتالدى ول. ۆيتسە-ءمينيستردىڭ ايتۋىنشا، وڭتۇستىك وڭىرلەرلەردەن سولتۇستىك وبلىستارعا كوشۋگە نيەتتى ادامداردى ىنتالاندىرۋدىڭ جاڭا باعىتتارى ەنگىزىلدى. بىرىنشىدەن، قونىس اۋدارعانداردىڭ شىعىندارى 35 ا ە ك كولەمىندە وتەلەتىن بولادى، ياعني وتباسىنىڭ ءاربىر مۇشەسىنە 79 مىڭ تەڭگە سوماسىندا بەرىلەدى. سونىمەن قاتار ءبىر جىل بويى كوشىپ بارعان وتباسىنىڭ باسپانانى جالداۋعا جۇمسايتىن شىعىندارى سۋبسيديالانادى.

«وسى باعىتتا ءبىز ايىنا 34 مىڭنان 68 مىڭ تەڭگەگە دەيىنگى سومادا قونىس اۋدارعان وتباسىعا بەرەمىز. كەيىننەن، تۇرعىن ءۇي قۇرىلىسىنىڭ جالپى باعدارلاماسى بويىنشا كوشىپ كەلگەن ادام باسپانا الۋعا ۇمىتكەر رەتىندە ىلىگەدى»، - دەدى نۇرىمبەتوۆ.

ق ر ۇكىمەتى انىقتاعان وڭىرلەرگە ەرىكتى تۇردە قونىس اۋدارعان تۇلعالارعا مەملەكەتتىك قولداۋ شارالارى قاراستىرىلعان. جىل سايىن، وڭىرلەر مەن جۇمىس بەرۋشىلەردىڭ ەڭبەك رەسۋرستارىنا سۇرانىسىن ەسكەرە وتىرىپ، ىشكى كوشى-قون كۆوتاسى بەلگىلەنەدى. اتالعان كوشتى ىنتالاندىرۋ تەتىگى رەتىندە، باستاپقى بەيىمدەلۋ جانە جول مەن جۇك تاسۋ شىعىنىن وتەۋ قۇرالدارىنان تۇراتىن، قازىرگى تاڭداعى الەۋمەتتىك پاكەتتى قولدانۋ جالعاسىن تابادى.

وسى جىلى 2,7 مىڭ ازاماتتىڭ قونىس اۋدارۋىنا سۋبسيديا تولەۋ ماقسات ەتىلگەن.

اۆتور: رۋسلان عابباسوۆ