قاسقىرجەم وسىمدىگىنىڭ ءتىس، باۋىر جانە وزگە دە اۋرۋلارعا قارسى ەمدىك پايداسى

استانا. قازاقپارات - قاسقىرجەم (اسپاراگۋس) - ەت جەڭدى، تىك وسەتىن كوپ جىلدىق وسىمدىك.

بيىكتىگى 10-25 س م. ءتۇپ جاعىنداعى جاپىراقتارى ۇزىن، دوڭگەلەكتەۋ كەلەدى دە، قاباتتالىپ، دوڭگەلەنە وسەدى. گۇلى سولعىن ءتۇستى نەمەسە سولعىن سارى ءتۇستى بولادى. تاۋدىڭ تاستى بەتكەيلەرىندە وسەدى.

جيناۋ جانە وڭدەۋ

قاسقىرجەمنىڭ جەر ءۇستى بولىگىنەن ءدارى جاسالادى. جاز بەن كۇزدە جينايدى دا، توپىراعىنان ارىلتىپ، قايناپ تۇرعان تۇرعان سۋعا ءبىر رەت باتىرىپ الىپ، كەپتىرەدى. قىشقىل ءدامدى ازىراق ۋلى كەلەدى، دەپ جازادى جاس-اي جۋرنالى.

ەم بولاتىن اۋرۋلارى:

قاندى تىيادى جانە كۇشەيتەدى. جاراقاتتىڭ اۋزىن قۋىرادى.

1. مۇرىننان اققان قاندى توقتاتۋ ءۇشىن 500 گ جاس قاسقىرجەمدى جۋىپ تازالاپ، ءجانشىپ ءنىلىن الادى. وعان 15 گ شەكەر قوسىپ ارالاستىرىپ، ىدىسقا سالىپ كەپتىرسە، قاتتى دەنەگە اينالادى. وسىنى 1,5-3 گ- نان ەكى رەت قايناعان سۋمەن ىشەدى. اشتى، قىشقىل تىتىركەندىرەتىن زاتتاردى جەۋگە بولمايدى.

2. باۋىردىڭ شۇعىل قابىنۋىنا 60 گ قاسقىرجەم مەن 30 گ ارپا وركەنىن سۋعا قايناتىپ ىشەدى.

3. بالالاردىڭ شوشىنۋ اۋرۋىنا 15-18 گ قاسقىرجەمدى سۋعا قايناتىپ ىشەدى.

4. نەسەپ ىلايلانىپ كەلگەندە، قاسقىرجەمدى سۋعا قايناتىپ، اق شەكەر قوسىپ ىشەدى.

5. كەپتىرىلگەن قاسقىرجەم ءشوبىن ورتەپ، كۇلىن الىپ، وسىمدىك مايىن ارالاستىرىپ، دەنەدەگى قىشىما بورتكەنگە جاقسا، اۋىرعاندى باسىپ، قىشىعاندى توقتاتادى.

6. ۇزاققا سوزىلعان شيقان، سىزداۋىققا قاسقىرجەمنەن بەلگىلى مولشەردە الىپ، ازىراق اس تۇزىن قوسىپ، جانشىپ، دايىندالعان ءدارىنى جارانىڭ بەتىنە كۇنىنە ەكى رەت جاعادى.

7. ەزۋگە اۋزدىق شىققاندا، قاسقىرجەم مەن جەمجەمىلدەن بەلگىلى مولشەردە الىپ، ازىراق تۇز قوسىپ، جانشىپ جاعادى.

8. وتقا نەمەسە سۋعا كۇيگەن كۇيىككە قاسقىرجەم مەن ارشانىڭ جاس ءبۇرىن قوسىپ جانشىپ، جاراعا تاڭادى نە كەپتىرىپ، ۇنتاقتاپ جاراعا سەبەدى.

9. ءتىستىڭ ەتى ءىسىنىپ، اۋىرعاندا، قاسقىرجەم مەن اشۋداستان تەڭ مولشەردە الىپ، سۋعا قايناتىپ اۋىزدى شايقايدى. جالپى پايدالانۋ مولشەرى 15-30 گ بولۋ كەرەك.