اقمولالىقتار ۋنيۆەرسيادا جەڭىمپازىن ءسان-سالتاناتپەن قارسى الدى - فوتو
ۋنيۆەرسيادا جۇلدەگەرىن قارسى الۋعا وبلىستىق دەنە شىنىقتىرۋ جانە سپورت باسقارماسىنىڭ، سپورت مەكەمەلەرىنىڭ باسشىلارى، جەرلەس سپورتشىلاردىڭ تۋعان-تۋىستارى مەن جانكۇيەرلەرى جانە وزگە دە سپورتسۇيەر قاۋىم جينالدى. جەڭىمپازعا ءتيىستى دەڭگەيدە قۇرمەت كورسەتىلدى. ەسكە سالا كەتەيىك، الماتىدا وتكەن 28- دۇنيەجۇزىلىك قىسقى ۋنيۆەرسيادادا اقمولالىق ولجاس كليمين ارالاس كوماندالىق سپرينتتە اننا شەۆچەنكومەن جۇپ قۇرىپ، ەل قورجىنىنا ماڭىزدى توعىزىنشى التىن مەدالدى سالعان بولاتىن.
ولجاس كليمين - شاڭعى جارىستارىنان قازاقستان رەسپۋبليكاسىنىڭ سپورت شەبەرى، شاڭعى جارىستارىنان قازاقستان رەسپۋبليكاسىنىڭ چەمپيونى، جاستار اراسىنداعى الەم چەمپيوناتتارىنىڭ قاتىسۋشىسى. كوكشەتاۋ قالاسىنىڭ ازاماتتىق قورعاۋ كوپسالالى كوللەدجىنىڭ ستۋدەنتى. «جارىس وتە تارتىستى ءوتتى. ماعان سەنىپ وسى جارىسقا قاتىسۋىما قول ۇشىن سوزعان جاتتىقتىرۋشىلارىما، جانكۇيەرلەرىمە العىسىم شەكسىز. كوماندالىق سپرينتتە وزىمە جۇكتەلگەن سەنىمدى اقتادىم دەپ ويلايمىن. ەستافەتالىق جارىستا دا جەڭىس تۇعىرىنان كورىنۋگە بولاتىن ەدى. الايدا، ءسال كۇشىم جەتپەي قالدى. الدا الەم كۋبوگى تۇر. اقپان ايىنىڭ سوڭىندا ەستونيادا وتەتىن وسى بايراقتى باسەكەگە قازىردەن باستاپ، دايىندالامىن»، دەيدى كليمين.
اۆتور: اسلان وسپانوۆ
