ديماشتى «امەريكا داۋىسىنا» بىلتىر دا، بيىل دا شاقىردى - جارناما-ديرەكتور ءشارىموۆ
«ءيا، امەريكاعا ءبىزدى شاقىردى. قازىر كورىپ تۇرسىزدار، ۋاقىت بولماي جاتىر. قىتايداعى كونكۋرستىڭ ءتورت كەزەڭىنەن وتتىك، الدا ءالى ون بايقاۋ بار. سونىڭ دايىندىعى ءجۇرىپ جاتقاننان كەيىن، وعان كەلىسىمدى تولىعىمەن بەرە المايمىز. ءبىز ءالى ناقتى بىلمەيمىز، وعان قاتىسامىز با، جوق پا. سەبەبى، ءدال قازىر بىزدە ۋاقىت جوق. «امەريكا داۋىسىنا» شاقىرۋ بىلتىر دا ءتۇستى، بيىل دا ءتۇستى. قىتايعا قاتىسىپ جاتقاننان كەيىن دە ءتۇستى. نەگىزى، قازىر كوپ باعدارلامالار بويىنشا شاقىرۋلار كەلىپ جاتىر»، - دەدى ءشارىموۆ قازاقپارات تىلشىسىنە بەرگەن سۇحباتىندا.
ايتا كەتەيىك، كۇنى كەشە استانادا وتكەن شارالاردىڭ بىرىندە قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا ديماش قۇدايبەرگەننىڭ «امەريكا داۋىسىنا» قاتىساتىنى جايىندا ايتتى. «ءبىزدىڭ ەكىنشى كۋرس ستۋدەنتىمىز - ديماش قۇدايبەرگەننىڭ قىتايدا ەل نامىسىن قورعاپ جۇرگەنىن ءبارىمىز جاقسى بىلەمىز. بۇعان دەيىن ول «جاس قاناتتا»، ودان كەيىن «سلاۆيان بازارىندا» جەڭىمپاز اتانعان.
قازىر قىتايداعى حالىقارالىق بايقاۋعا قاتىسىپ جاتىر. ەندى، ءبىز ونى «ەۆروۆيدەنيەگە» دايىنداپ جاتىرمىز. سوسىن ول «امەريكا داۋىسىنا» قاتىسادى. بۇگىن ول لوس- اندجەلەس قالاسىنداعى ميۋزيكل- شوۋعا شاقىرۋ الدى»، - دەدى مۇساقوجايەۆا.
بۇگىن قازاقپارات تىلشىسىنە سۇحبات بەرگەن ۋنيۆەرسيتەت رەكتورى ديماشتىڭ ەكىنشى كۋرستا ەمەس، ءۇشىنشى كۋرستا وقيتىنىن ناقتىلاپ بەردى. «ەندى، بىزدە ستۋدەنت كوپ قوي. ءبارىن بىردەي ەستە ساقتاۋ وڭاي ەمەس»، - دەيدى مۇساقوجايەۆا.
اۆتور: ارمان اسقاروۆ
