جاياۋ مۇسانىڭ قىزى كاسىپتىڭ فوتوسى العاش رەت جاريالاندى - فوتو

«مەنىڭ اجەم - جاياۋ مۇسانىڭ قىزى كاسىپ (1888-1938) . فوتونى 1937 -جىلى پاۆلوداردا بەلگىلى فوتوگراف دميتري باگايەۆ تۇسىرگەن. الەۋمەتتىك جەلىدە ءبىرىنشى رەت جاريالانىپ وتىر» ، دەپ جازادى ارمان قاني ءوزىنىڭ فەيسبۋك الەۋمەتتىك جەلىسىندەگى پاراقشاسىندا.

 سونداي- اق، ول مىناداي قىسقاشا تاريحي دەرەكتەر كەلتىرەدى (قىسقارتىلىپ الىندى) :

"اتامىز قاني مەن اجەمىز كاسىپ 1905 -جىلى قوسىلعان.

«ءۇش جۇزگە اتى ءمالىم» كۇرەسكەر اقىن- كومپوزيتوردىڭ قىزى تەگىنە تارتپاي قويا ما، جاستايىنان ءانشى ءارى سوزگە ءدىلمار، مىنەزى وتكىر بولعان كورىنەدى. قانيمەن ۇيلەنۋ تويىندا جىگىت جاعى ءبىر- بىرىنە: « ءاندى سەن باستا» ، «جوق، الدىمەن ءوزىڭ ايت» دەپ، ابىگەرگە تۇسكەندە، شىمىلدىق ىشىندە وتىرعان ون جەتى جاسار جاس كەلىن اكەسى جاياۋ مۇسانىڭ «اق سيساسىن» شىرقاتىپ جىبەرىپ، كۇيەۋدىڭ تۋىستارىن قاتتى ۇيالتقان كورىنەدى. كەيىن اتالارىمىز جۇرتشىلىق كوپ جينالعان ويىن- تويلاردا كاسىپتى ارۋانانىڭ ۇستىنە وتىرعىزىپ ءان سالدىراتىن بولىپتى. وسىنداي قولايلى جاعداي مەن ءوزىنىڭ دارىن- قابىلەتىنىڭ ارقاسىندا، كاسىپ اجەمىز اكەسىنىڭ اندەرىنىڭ ەدىرەي ەلىنە كەڭىرەك تارالۋىنا ەلەۋلى ەڭبەك سىڭىرگەن.

قاني مەن كاسىپ قۇلجانبەك (1907-1934) ، باقتان (1909-1995) ، ىرزاگۇل، اقىلبەك، داۋىلبەك، مىرزاگۇل، قامالبەك، قۇرماش (1922؟ -1935) ، ناعيما، ءانۋار (1928-1991) ، اۋعانباي (1930-1932) اتتى ون ءبىر بالا كورگەن.

كاسىپ اجەمىزدىڭ ءوزى 1938 -جىلى، 5 - ناۋرىزدا، 50 جاسىندا پاۆلودار قالاسىندا دۇنيە سالعان، بەيىتى «حيمقالاشىق» ىقشام اۋدانىنداعى ەسكى زيراتتا".