قازاقستان قىتايدان كەلەتىن جۇمىرتقاعا مۇقتاج ەمەس - ايتۋعانوۆ

استانا. قازاقپارات - بۇگىن استانادا وتكەن باسپا ءسوز ءماسليحاتىندا ق ر اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ قىتايلىقتاردىڭ قۇس جۇمىرتقاسىن جاساندى جولمەن ءوندىرىپ جاتقان ۆيدەوسىنا بايلانىستى پىكىرىن ايتتى، دەپ حابارلايدى قازاقپارات.

بۇل رەتتە ول مينيسترلىك ماماندارى وسى روليكتەردى كورگەنىن، سونداي-اق جاقىندا تاعى ءبىر روليكتە ولار باسقا دا ازىق-تۇلىك ونىمدەرىن وسىنداي جولمەن دايىنداپ جاتقانى كورسەتىلگەندىگىن ايتتى.

«بۇلاردىڭ بارلىعى ادەيى جىبەرىلگەن بەينەكورىنىستەر بولۋى مۇمكىن»، - دەدى ايتۋعانوۆ. وسى ورايدا ءبىرىنشى ۆيتسە-مينيسترگە تىلشىلەر تاراپىنان «قازاقستان قىتايدان جۇمىرتقا يمپورتتاي ما؟» دەگەن سۇراق قويىلدى.

«قىتايدان ەلىمىزگە اۋقىمدى كولەمدە جۇمىرتقا تاسىمالدانىپ جاتىر دەپ ايتا المايمىز. بۇگىندە تاۋىق جۇمىرتقاسى بويىنشا قازاقستان ىشكى قاجەتتىلىكتى تولىقتاي قامتاماسىز ەتىپ وتىر. قىتاي تاراپى بىزدەن جۇمىرتقانى، سونداي-اق باسقا دا ونىمدەردى وزدەرىنە تاسىپ جاتىر، سەبەبى، قازاقستاندىق تاۋارلار ەكولوگيالىق تۇرعىدا تازا ەكەنى بەلگىلى. بۇل تۇرعىدا كەرىسىنشە تاۋارلار قازاقستاننان ەكسپورتتالۋى ءتيىس»، - دەدى ول.

اۆتور: رۋسلان عابباسوۆ