ابايەۆ مەملەكەتتىك تىلگە قاتىستى سىنعا جاۋاپ بەردى

استانا. قازاقپارات - ق ر اقپارات جانە كوممۋنيكاتسيالار مينيسترلىگىنىڭ بۇگىنگى كەڭەيتىلگەن القا ماجىلىسىندە «شالقار» راديوسىنىڭ جۋرناليسى تەمىرحان مومبەك ۇلى مينيسترگە مەملەكەتتىك ءتىل ماسەلەسىنە قاتىستى سۇراق قويدى، دەپ حابارلايدى قازاقپارات ءتىلشىسى.

 ءوز سوزىندە ول كەڭەستەر كەزىندەگى قازاق ءتىلدى باسىلىمداردى اشۋدىڭ ماشاقاتىن ەسكە الىپ، اقپارات سالاسىنداعى تىلدىك ساياسات پروبلەماسىن قوزعادى. مينيستر ابايەۆ وسى ماسەلەگە قاتىستى ءوز ۇستانىمى ءبىلدىردى.

«ول كۇردەلى ماسەلە ەكەنىن ءبارىمىز جاقسى بىلەمىز. ەكرانداعى ءماتىن نەگە قازاقشا جازىلمايدى، باياندامانى نەگە شەت تىلدە جاسايدى دەپ ايتىپ جاتىرسىز. ەڭ الدىمەن قازاقستاننىڭ ەگەمەن ەل بولعانىنا ءتاۋبا ەتۋ كەرەك. بىزدە ءبارى امان- ەسەن، تىنىش. قازاقتىڭ سانى كوبەيىپ كەلەدى. بالالاردىڭ 90 پايىزدان استامى قازاق ءتىلدى مەكتەپتەرگە بارىپ جاتىر. سوعان ءتاۋبا ەتۋ كەرەك. جاڭا پەتروپاۆلدىڭ اتىن اۋىستىرۋ تۋرالى ايتىپ وتىرسىز. ەگەر ءسىز ءدال قازىر سول جاققا بارىپ، بارىمەن جاعالاسىپ، شۋ شىعارساڭىز، ونىڭ سوڭى نە بولادى؟ قالانىڭ اتاۋىن اۋىستىراسىز، ءبىراق سول جەردە جۇرگەن ادامداردىڭ ءبارىن قازاق قىلا المايسىز عوي. وسى نارسەنى ءتۇسىنۋ كەرەك»، - دەدى ابايەۆ.

ءمينيستردىڭ ايتۋىنشا، قازاقتىڭ بىرنەشە تىلدە سويلەي الاتىنىنا ماقتانۋ قاجەت. وسى ورايدا ول كەشەگى ۋنيۆەرسيادانىڭ جابىلۋىندا ءۇش تىلدە ءسوز سويلەگەن ۇكىمەت باسشىسى مەن الماتى قالاسى اكىمىن مىسال رەتىندە كەلتىردى.

«سوندىقتان ۇيدەگى اڭگىمەنى سىرتقا كوپ شىعارماۋ قاجەت. جۇمىس ىستەۋ كەرەك. مىسالى، ءسىز «شالقار» راديوسىنىڭ مىقتى جۋرناليسى بولساڭىز، ساپالى ءارى قىزىقتى باعدارلاما جاساڭىز. ونى مىنا جەردە وتىرعانداردىڭ ءبارى تىڭدايدى»، - دەپ اتاپ كورسەتتى مينيستر.

اۆتور: ارمان اسقاروۆ