پرەزيدەنت جازعا تامان تاعى ءبىر جاڭالىقتى جاريالايدى - جولداسبەكوۆ

استانا. قازاقپارات - بۇگىن ق ر اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا ماجىلىسىنە قاتىسقان قوعام قايراتكەرى مىرزاتاي جولداسبەكوۆ مەملەكەت باسشىسىنىڭ الداعى جازدا قازاق ءۇشىن جاعىمدى تاعى ءبىر جاڭالىقتى جاريالايتىنىن جەتكىزدى، دەپ حابارلايدى قازاقپارات ءتىلشىسى.

ءسوز بارىسىندا قوعام قايراتكەرى ەلباسىنىڭ «ۇلى دالا ۇلاعاتتارى» اتتى كىتابىنا توقتالعان بولاتىن. «سوندا ول كىسىنىڭ (ەلباسىنىڭ- رەد.) ءبارىن ءبىلىپ تۇرىپ، ايتقان ءبىر كەرەمەت ءسوزى بار. «مەنى قازاق تىلىندە سويلەي المايدى دەپ كىم ايتادى؟ سويلەي الامىن، ارينە. فرانسيا مەن رەسەيدىڭ پرەزيدەنتى، قىتايدىڭ باسشىسى ءوزىنىڭ تىلىندە بايانداما جاسايدى، مەن دە مەملەكەتتىك تىلدە سويلەيمىن. سوندىقتان ءبىز جان-جاعىمىزعا قاراۋىمىز كەرەك». سول كىتاپتا جازىلعان عوي، العاشقى كەزدە وسى سەلينوگرادتا 17-اق پايىز قازاق بولدى. قازىر ەڭ قازاعى كوپ قالا - استانا. وتكەندە ەلباسىمەن ەپتەپ سويلەسىپ قالىپ ەدىم. قۇداي قالاسا، بيىل جازدا قازاقستان حالقىنىڭ سانى 18 ميلليونعا جەتكەنىن جاريالايتىن بولامىز دەپ جاتىر ەكەن. بۇل ۇلكەن قۋانىش دەپ ويلايمىن»، - دەدى جولداسبەكوۆ.

ايتا كەتەيىك، بۇگىنگى القا ماجىلىسىندە مينيستر داۋرەن ابايەۆ اقپارات پەن كوممۋنيكاتسيالار سالاسىندا اتقارىلعان جۇمىستار بويىنشا ەسەپ بەرىپ، وتاندىق تەلەارنالاردىڭ الدىنا ءبىرقاتار مىندەتتەر قويدى. ال قوعامدىق كەڭەستىڭ مۇشەسى بيبىگۇل جەكسەنباي مەملەكەتتىك تىلدە حابار تاراتاتىن بۇقارالىق اقپارات قۇرالدارىن بارىنشا دامىتۋ قاجەتتىگىن جەتكىزدى.

اۆتور: ارمان اسقاروۆ