مەملەكەتتىك تىلدە حابار تاراتاتىن اقپارات قۇرالدارىن بارىنشا دامىتۋ قاجەت - جۋرناليستەر

استانا. قازاقپارات - ق ر اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا ماجىلىسىندە قوعامدىق كەڭەس مۇشەسى بيبىگۇل جەكسەنباي جۋرناليستەر قاۋىمىنىڭ ءبىرقاتار ۇسىنىستارىن جاريالادى، دەپ حابارلايدى قازاقپارات ءتىلشىسى.

 «بىزگە رەسپۋبليكالىق جانە اۋداندىق بۇقارالىق اقپارات قۇرالدارىن بارىنشا دامىتىپ، باسەكەگە قابىلەتتى دەڭگەيگە كوتەرۋ كەرەك. اسىرەسە، مەملەكەتتىك تىلدە حابار تاراتاتىن اقپارات قۇرالدارىنا باسىمدىق بەرگەنىمىز ءجون. مەملەكەتتىك ورگانداردا جۇمىس ىستەيتىن باسپا ءسوز حاتشىلارىنىڭ، بۇقارالىق اقپارات قۇرالدارى سالاسىنداعى قىزمەتكەرلەردىڭ، سونداي- اق جۋرناليستەردىڭ مەملەكەتتىك ءتىلدى ءبىلۋ دەڭگەيىن ارتتىرۋ قاجەت. ال مەملەكەتتىك تىلدەگى باعدارلامالاردىڭ ساپاسى جوعارى بولۋعا ءتيىس»، - دەدى ول مينيسترلىكتىڭ كەڭەيتىلگەن القا ماجىلىسىندە.

ونىڭ سوزىنە قاراعاندا، بۇگىندە بارلىق ايماقتاردى وتاندىق تەلە- راديو جەلىلەرىمەن قامتامىز ەتكەن ءجون. وسى ورايدا شەكارا ماڭىنداعى ەلدى مەكەندەردى نازاردان تىس قالدىرماۋ قاجەت. سونداي- اق وتاندىق گازەت- جۋرنالداردى كەڭىنەن تارتۋ ماقساتىندا پوشتا بولىمشەلەرى مەن كيوسكىلەردى كوبىرەك اشقان دۇرىس. «ەلىمىزدىڭ شالعاي اۋىلدارىندا حالىق اقپاراتتىق ۆاكۋۋمدا وتىرماس ءۇشىن عالامتور جەلىسىن بارلىعىنا بىردەي تارتۋ قاجەت. سوندا ەلدەگى جاڭالىقتار جايىندا حاباردار بولىپ وتىرادى»، - دەپ اتاپ كورسەتتى كەڭەس مۇشەسى.

اۆتور: ارمان اسقاروۆ