قازاقستان قۇراماسى بەلارۋستەن ەسەسىن قايتارىپ الدى

استانا. قازاقپارات - فۋتزالدان قازاقستان قۇراماسى بەلارۋس كومانداسىنان ەسەسىن قايتارىپ الدى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەيىك، جەرلەستەرىمىز ءبىرىنشى ويىندا قارسىلاستارىنا ەسە جىبەرىپ العان بولاتىن. ەكىنشى ماتچتا الەسيونىڭ شاكىرتتەرى قارىمتا كەزدەسۋگە ەسە قايتارۋ ءۇشىن شىقتى.

ناتيجەسىندە قازاقستان قۇراماسى بەلارۋس قاقپاسىنا ءۇش جاۋاپسىز گول سوعىپ، قارسىلاسىنا ەش مۇمكىندىك بەرمەدى. ويىننىڭ 8-مينۋتىندا ميحايل پەرشين قاقپاشىمەن بىرگە-ءبىر شىعىپ، گولوۆنيەۆتەن ايلاسىن اسىردى - 1:0.

اراعا التى مينۋت سالىپ جاس فۋتزالشى ءبىرجان ورازوۆ سۇلەيمەنوۆتىڭ ادەمى پاسىنان ەسەپتى ەسەلەدى. ال ماتچتىڭ سوڭعى مينۋتىندا جامانقۇلوۆ ناتيجەنى قورىتىندىلادى.

قازاقستان 3:0 بەلارۋس

گولدار: پەرشين 8, ورازوۆ 14, جامانقۇلوۆ 40

قازاقستان: گۋروۆ، شامرو - كناۋب، جامانقۇلوۆ، سۇلەيمەنوۆ (ك)، دوۆگان، ەسەنامانوۆ، پەرشين، تاكۋ، دۋگلاس، سولۋمەنكو، رىندين، تورەعازين، اقبالىقوۆ، ورازوۆ

بەلارۋس: گولوۆنيەۆ، چۋريلين - گۋساكوۆ، كرىكۋن، الەينيكوۆ، لازيۋك، ولشيەۆسكي، سيليۆونچيك، چەرنيك (ك)، راگوۆيك، لوس، گونچاروۆ، سەليۋك، ماتۆەەنكو

تورەشىلەر: قوسمۇحامبەتوۆ، ابرايەۆ (ەكەۋى دە - قازاقستان).

اۆتور: كۇنسۇلتان وتارباي