09:35, 09 - اقپان 2017 | GMT +5
ەل باسقارۋدان بوساعان باراك وباما قالاي دەمالىپ ءجۇر - فوتو، كەسكىن
استانا. قازاقپارات - ا ق ش- تىڭ ەكس-پرەزيدەنتى باراك وباما جۇبايى ميشەلمەن بىرگە ميللياردەر ريچارد برەنسوننىڭ ارالىندا دەمالىس وتكىزدى دەپ حابارلايدى Zanoza.kq سايتى.
نەككەر ارالىندا دەمالعان باراك وبامانىڭ سۋرەتتەرىنە قاراپ، ونىڭ ۋاقىتى بوسقا وتپەگەنىن بايقاۋعا بولادى. ەكس-پرەزيدەنتتى جولداسىمەن بىرگە ءوزىنىڭ جەكەمەنشىك ارالىنا قوناققا شاقىرعان برەنسون تانىمال ساياساتكەردىڭ ەڭبەك دەمالىسى قالاي وتكەنىن ايتىپ، سۋرەتتەرىن جاريالاعان.
باراك پەن ميشەل جاعاجايدا قۇر بوسقا كۇنگە قىزدىرىنىپ جاتا بەرمەي، سۋداعى سپورت تۇرلەرىمەن بەلسەندى اينالىسقان. ول ءتىپتى كايتينگ بويىنشا ريچاردپەن جارىسىپ، سۋدىڭ استىندا ۇزاق ۋاقىت بولعانى ءۇشىن ونى جەڭىپ شىعىپتى.
ب ا ق تاراتقان سۋرەتتەر مەن ۆيدەودا بۇرىنعى پرەزيدەنتتىڭ ەكى ەزۋى قۇلاعىنا جەتكەنشە كۇلىپ، دەمالىستان ءلاززات الىپ جۇرگەنى انىق كورىنەدى.
