استاناعا قوسىلعان جەر تەلىمدەرىنىڭ اۋماعىندا ەلدى مەكەندەر جوق

استانا. قازاقپارات - ەلوردانىڭ يەلىگىنە ەنگەن جەر تەلىمدەرىنىڭ اۋماعىندا ەلدى مەكەندەر جوق. بۇل تۋرالى كەشە باسپا ءسوز ءماسليحاتىندا «استانا قالاسىنىڭ جەر قاتىناستارى جانە جەردىڭ پايدالانىلۋى مەن قورعالۋىن باقىلاۋ باسقارماسى» م م باسشىسى نازىمبەك كەنجەبايەۆ ءمالىم ەتتى،

 دەپ حابارلايدى قازاقپارات.

«اعىمداعى جىلدىڭ 6 - اقپانىندا ەلباسى استانا قالاسىنىڭ شەكاراسىن وزگەرتۋ تۋرالى جارلىققا قول قويدى. بۇل قۇجاتتىڭ نەگىزگى ماقساتى ەلورداعا  8719 گەكتار جەردى قوسۋدى كوزدەيدى. وسى رەتتە بىرىنشىدەن، استانا اۋەجايىنىڭ اۋماعىن ۇلعايتۋعا قاتىستى شارالار قامتىلىپ وتىر. ويتكەنى، كوكتەمدە جانە كۇزدە ۇشاقتارعا ارنالعان جولاقتاردى سۋ باسۋ قاۋپى مۇمكىن بولعاندىقتان، ءتيىستى جەر تەلىمى قاجەت بولدى»، - دەدى كەنجەبايەۆ.

 ونىڭ ايتۋىنشا، بۇل باعىتتا «مايبالىق» كولى اۋدانىنداعى كولەمى  7300 گەكتار جەر تەلىمى ەسكەرىلىپ وتىر.

سونىمەن قاتار ول 460 گەكتار جەر 96 رازەزد بەن «استانا- كوكشەتاۋ» اۆتوبانى ارالىعىندا جاڭا زيراتتى ورنالاستىرۋعا بولىنەتىنىن اتاپ ءوتتى. مۇنىمەن قوسا، تاعى دا 959 گەكتار جەر ۇلتتىق پانتەونعا تيەسىلى بولادى.

«جارلىق شىققاننان بەرى قالانىڭ اۋماعىنا قوسشى، تايتوبە جانە باسقا دا ەلدى مەكەندەر ەندى دەپ تاراعان اقپارات شىندىققا جاناسپايدى. اتاپ ايتقاندا، قالاعا تاياۋدا تيەسىلى بولعان جەر تەلىمدەرىندە ەلدى مەكەندەر مەن اۋىلدار قامتىلماعان. بۇل رەتتە حالىق قونىستانباعان تەك بوس جەرلەر عانا شاھار يەلىگىنە بەرىلدى»، - دەدى باسقارما باسشىسى.

بۇدان بۇرىن حابارلانعانداي، جاقىندا ەلباسى جارلىعىمەن استانا قالاسىنىڭ شەكاراسى كەڭەيتىلدى.