سوت مايكل دجەكسون ءانىنىڭ مازمۇنىن انىقتاۋعا تىرىسۋدا - كەسكىن
ا ق ش سالىق باسقارماسى ءانشىنىڭ وكىلدەرىن سوتقا شاقىردى. سالىق ماماندارى 2009 -جىلى قايتىس بولعان ءانشىنىڭ مۇلىكتەرى بويىنشا 700 ميلليون دوللار سالىق پەن ءوسىماقى تولەنبەگەن دەپ ەسەپتەيدى. ءىستى قاراپ جاتقان سوت ءانشىنىڭ Thriller كومپوزيتسياسىنىڭ سوڭىنداعى «قىرىق مىڭ جىلعى فانك» تىركەسىنىڭ ماعىناسى ونى بۇرىننان قىزىقتىراتىنىن مويىندادى. ەڭ قىزىعى، بۇل سوزدەردى ءانشىنىڭ ءوزى ەمەس، قورقىنىشتى فيلمدەر اكتەرى ۆينسەنت پرايستىڭ اۋزىنان ەستيمىز.
سوتتا كۋاگەر رەتىندە قاتىسىپ جاتقان مايكل دجەكسوننىڭ بۇرىنعى ادۆوكاتى دجون برانكا: «بۇل - تاعدىر»، - دەپ جاۋاپ بەردى. ءانشى مۇراگەرلەرىنىڭ قورعاۋشىلارى مايكل دجەكسون قايتىس بولعان كەزدە ونىڭ قارىزدارى 400 ميلليون دوللاردى قۇراعانىن، ال ونىڭ ساۋدا ماركاسى رەتىندە تىركەلگەن ەسىمىنىڭ ءوزى 2105 دوللار تۇراتىنىن مالىمدەدى. سالىقشىلار ساۋدا ماركاسىن ايتارلىقتاي جوعارى باعالايدى - 434 ميلليون دوللار.
ادۆوكات برانكا 1990 -جىلدارى جاسوسپىرىمدەرگە قاتىستى شىققان ايعاي- شۋدان كەيىن ءانشىنىڭ ءىرى شىعىندارعا ۇشىراعانىنا كۇمان كەلتىرمەيدى. 2005 -جىلى ءانشى اتالعان ىسكە قاتىستى اقتالىپ شىقتى، الايدا وسىدان سوڭ ونىڭ شىعارماشىلىق جولى ەداۋىر كەدەرگىلەرگە تاپ بولدى.
برانكا سوت پروتسەسىندە ءانشىنىڭ ءومىرى تۋرالى ايتا كەلىپ، ونى «دانىشپان» جانە «ەرەكشە جىگىت» دەپ اتاپ، كوزىنە جاس الدى. ا ق ش سالىق باسقارماسىنىڭ وكىلى ءانشىنىڭ بۇرىنعى ادۆوكاتىنا سۇراقتار قويعان جوق، ءبىراق ونى كەلەسى وتىرىسقا شاقىراتىنىن اتاپ ءوتتى.
سالىقشىلاردىڭ شاعىمىن قاراستىرۋ ءۇش اپتاعا جازىلادى دەپ كۇتىلۋدە.
مايكل دجەكسون 2009 -جىلى ماۋسىمدا 51 جاسقا قاراعان شاعىندا رەسمي دەرەكتەر بويىنشا اۋرۋدى باساتىن ءدارى- دارمەكتەردى ارتىعىمەن قابىلداپ قويعانى سەبەپتى قايتىس بولدى. ول كوزى تىرىسىندە 350 ميلليوننان استام البومدار مەن سينگلداردى ساتىپ ۇلگەردى، سونىڭ ارقاسىندا ول الەمدەگى ەڭ تابىسى مول پوپ- ارتىستەر ءتىزىمىنىڭ كوشباسىنا شىقتى.
1983 -جىلى جارىققا شىققان Thriller الەمدە ەڭ كوپ ساتىلعان البوم بولىپ سانالادى: ءتۇرلى باعالاۋلار بويىنشا ول الەمدە 51 - 65 ميلليون دانامەن ساتىلعان.
دەرەككوزى: www.bbc.com
