ديماش بايقاۋدا قازاق تىلىندە دە ءان ايتادى - سۆەتلانا ايتبايەۆا
بۇل تۋرالى ونىڭ اناسى سۆەتلانا ايتبايەۆا اقتوبە جاستارىمەن، ستۋدەنتتەرمەن كەزدەسۋىندە ايتتى، دەپ حابارلايدى قازاقپارات ءتىلشىسى. «قازىرگى كەزدە ديماشقا سىزدەردىڭ قولداۋلارىڭىز قاجەت. ماتەريالدىق جاعىنان ەمەس، رۋحاني دەمەۋ كەرەك. بۇل قيىن، جاۋاپكەرشىلىگى جوعارى بايقاۋ. سەبەبى، 14 تۋردان تۇرادى. ءار تۋردا جاڭا ءان ايتىلادى. ءاندى ۇيىمداستىرۋشىلار تاڭدايدى. ءاندى جەتكىزە ورىنداۋدا، وبرازدى الىپ شىعۋدا سىزدەردىڭ ىقىلاستارىڭىز دەم بەرەدى. ال اقتوبەدەگى العاشقى كەزدەسۋ احمەت جۇبانوۆ اتىنداعى مۋزىكالىق كوللەدجدەن باستالۋى، قۋانتتى. بەلسەندى امير يبراگيم «ءبىز قالاي كومەكتەسە الامىز؟» دەپ سۇرادى. ءسويتىپ، حاتتار، بەينەسالەمدەمەلەر جولداي باستادى. ولاردىڭ اراسىندا جاستار دا، ۇستازدارى دا بار»، - دەدى ديماشتىڭ اناسى سۆەتلانا ايتبايەۆا.
اقتوبەلىكتەر ديماش قۇدايبەرگەنگە ءار كۇن سايىن جاقسى تىلەكتەرى مەن لەبىزدەرىن جەتكىزىپ وتىرادى. مۇنى ونىڭ اتا-اناسى قانات پەن سۆەتا ايتبايەۆتار دا ءبىلىپ، ريزاشىلىعىن ءبىلدىرىپ وتىر. «بايقاۋ وتە قيىن. ءار تۋر سايىن وزگە تىلدە ءان شىرقايدى. ەڭ قيىنى قىتاي تىلىندە ءان ايتۋ بولدى. ديماش ونى دا ۇيرەنىپ، مەڭگەرىپ الدى. سەنبى كۇنى بارلىعىمىز ناتيجەسىن كورەمىز. ءبىر ايتا كەتەتىن جايت، ول بۇل بايقاۋدا قازاق تىلىندە دە ءان ايتادى. ازىرگە ءبىز ۇسىنعان اندەردىڭ ەشقايسىسى ۇيىمداستىرۋشىلاردىڭ سۇزگىسىنەن وتپەي تۇر» - دەدى س. ايتبايەۆا.
ديماش دومبىرا تارتۋدى كۇيشى جايلاۋ اسىلحانوۆتان ۇيرەندى. ول اقتوبە مۋزىكالىق كوللەدجىندە ءبىلىم الا ءجۇرىپ، قوسىمشا ساباق العان. «مۋزىكا كوللەدجىنىڭ ستۋدەنتى ءۇشىن ءبىر سالانى مەڭگەرۋ ازدىق ەتەدى. سوندىقتان اسپاپتا ويناپ، مۋزىكا تاريحىن دا ءبىلۋ پارىز. ونەردى تەرەڭ مەڭگەرۋ، ۇلكەن ساحناعا جولداما العان كەزدە ۇلكەن سەپتىگىن تيگىزەدى»، - دەدى س. ايتبايەۆا.
ايتا كەتەيىك، ديماش قۇدايبەرگەن قىتايدا ۆوكالدان ساباق الۋدى توقتاتقان. «ديماش ۆوكالدان 2-3 ساباق الىپ، كەيىن توقتاتتى. ول «مارات اعاما (مارات ءايتىموۆ - ديماشتىڭ ۇستازى) ەشكىم جەتپەيدى دەپ بارماي قويعان»، - دەدى س. ايتبايەۆا.
اۆتور: التىناي ساعىندىقوۆا
