ماركالىق اياق كيىم كيگەن موڭعول مۋمياسىنىڭ جاسى انىقتالدى - فوتو
موڭعول ارحەولوگتارى باتىس ماڭعوليانىڭ بورت باگيين ءۇزۇۇرت گيالان ولكەسىندە جۇرگىزگەن قازبا جۇمىستارى بارىسىندا ايەلدىڭ سۇيەگىن تاپتى. موڭعول جانە تۇرىك زەرتتەۋشىلەرىنىڭ توبى تابىلعان زاتتىڭ 9 ءتۇرلى ۇلگىسىن الىپ، ساراپتاما جاساۋ ءۇشىن ا ق ش- قا جىبەردى. 
ساراپتاما ناتيجەسى بويىنشا، كيىزگە ورالىپ، مۋمياعا اينالدىرىلعان ادامنىڭ دەنەسى IX- X عاسىرداعى قىرعىز قاعاناتىنا تيەسىلى.
سونىمەن قاتار، ارحەولوگتار ەجەلگى قابىردان 40 تان استام ارتەفاكت: ەر-توقىم، جۇگەن، بالشىقتان جاسالعان قۇمىرا، اعاش توستاعان، استاۋ، تەمىر قازان، جىلقىنىڭ تۇتاس قالدىقتارىن تاپتى. ارحەولوگتار وسى جەردەن جاستىقتاردى، قويدىڭ باسى مەن تۇتاس قابىرعاسى سالىنعان كيىزدەن جاسالعان جول سومكەنى، ەشكىنىڭ سۇيەكتەرى مەن توستاعانعا ارنالعان شاعىن تەرى سومكەسىن تاپتى.
حوۆد ايماعى مۇراجايىنىڭ مامانى ب. ءسۇحبااتار حابارلاعانداي، مۋميالانعان ايەل اقسۇيەكتەر وتباسىنان ەمەس، قاراپايىم حالىقتىڭ اراسىنان شىققان. سەبەبى، ول جىبەك ماتادان تىگىلگەن كيىمدەر كيمەگەن.
ايتا كەتەيىك، مۋميانىڭ اياعىندا بولعان اياق-كيىمدى جەلى قولدانۋشىلارى «Adidas» فيرماسىنىڭ كروسسوۆكاسىنا ۇقساتقان ەدى.
