تازا التىننان جاسالعان زەرگەرلىك بۇيىمدى جاساندى التىننان قالاي ايىرۋعا بولادى
ونىڭ قۇپياسىمەن قازاقپارات تىلشىسىنە سۇحبات بەرگەن «ۇلتتىق ساراپتاما جانە سەرتيفيكاتتاۋ ورتالىعى» ا ق باعالى مەتالدارمەن جۇمىستى ۇلەستىرۋ ءبولىمىنىڭ باستىعى ەربول سەيسەنبايەۆ ءبولىستى.
ونىڭ ايتۋىنشا، ەڭ ءبىرىنشى كەزەكتە تاۋاردىڭ سەرتيفيكاتتالعاندىعى تۋرالى تاڭبانىڭ بولۋىنا نازار سالعان ءجون. ەگەر مۇنداي تاڭبا بار بولسا، وندا ول تاۋاردىڭ قاجەتتى تەكسەرۋدەن وتكەندىگىن بىلدىرەدى. «بازاردا زەرگەرلىك بۇيىم وتە كوپ. ءبىراق، جىلتىراعاننىڭ بارلىعى التىن ەمەس. زەرگەرلىك بۇيىم ساتىپ العان كەزدە ونىڭ ساپاسى مەن سىناماسى جايىندا ويلاي بەرمەيمىز. ەگەر تاۋار ارزان بولسا، وندا ونىڭ ءوزى كۇدىك تۋدىرۋى ءتيىس. تاۋاردا 585 سىناماسى تۇرسا، وندا بۇل اتالعان بۇيىمنىڭ 58,5 پايىزى تازا التىن، ال قالعانىنىڭ بارلىعى قوسپا ەكەندىگىن بىلدىرەدى»، - دەدى سەيسەنبايەۆ.
ءبىراق، ساراپشى سىنامانى قولدان باسىپ قويۋ ىقتيمالدىعى دا جوعارى ەكەندىگىن باسا ايتتى. «كەز كەلگەن ساتىپ الۋشى ۇلكەيتكىش اينەك سۇراپ الىپ، تاڭباسىن قاراي الادى. ءبىزدىڭ تاڭبامىز لاتىن ارىپتەرىمەن kz دەپ بەلگىلەنىپ، سىناماسى سانمەن ايقىن كورىنىپ تۇرۋى ءتيىس. مۇنان بولەك، وكىلەتتى ورگاندى بىلدىرەتىن التى قىرلى بەلگى مەن بارىستىڭ بەينەسى بولۋى قاجەت»، - دەدى ول.
ونىڭ سوزىنە قاراعاندا تاۋار ە ا ە و- عا كىرمەيتىن ەلدەردەن اكەلىنەتىن بولسا، وندا كەدەندە مەملەكەتتىك ينسپەكتور بەرەتىن مەملەكەتتىك اكتى بولۋى كەرەك. «بۇل تاۋار بىزدە تەكسەرىلىپ، قورىتىندى بەرىلەدى. وعان دەيىن ساتىلىمعا شىعارىلمايدى. كاسىپكەر مەملەكەتتىك اكتى العاننان كەيىن كەدەن قىزمەتىنە بارىپ، باج سالىعىن تولەيدى. سودان كەيىن عانا تاۋار ساتىلىمعا شىعارىلادى. ەگەر ساتۋشىدا نە مەملەكەتتىك اكتى، نە سالىق تولەگەندىگىن دالەلدەيتىن قۇجات بولماسا، وندا تاۋار زاڭسىز اكەلىنگەن دەگەن ءسوز»، - دەدى ەربول سەيسەنبايەۆ.
سونىمەن قاتار ساراپشى باعالى تاستار (بريلليانت، رۋبين) دا تابيعي جانە جاساندى بولاتىندىعىن اتاپ ءوتتى. «جاڭا زاڭعا ەگەر تاس جاساندى بولسا، وندا بيركادا كورسەتىلۋى تيىستىگى تۋرالى جەكە تارماق بار. بۇعان دەيىن مۇنداي بولماعان ەدى. ماسەلەن، جاساندى جانە تابيعي رۋبين تاسى بار بىردەي ساقينالاردىڭ باعاسىندا ايتارلىقتاي ايىرماشىلىق بار»، - دەپ ءتۇسىندىردى ول.
اۆتور: مارلان جيەمباي
