قازاقتار ءوز بالالارىنا قانداي ەرەكشە ەسىمدەر بەرەدى
اقپانتوقپانتۇرارقوجا - وسىدان بىرنەشە جىل بۇرىن وڭتۇستىك قازاقستان وبلىسىنىڭ تۇرعىنى ءوزىنىڭ 20 ارىپتەن تۇراتىن ۇزاق ەسىمى ارقىلى عالامتور جۇلدىزىنا اينالعان ەدى.
ەرتۋعان - ومىرگە ەر جۇرەك، باتىر بولىپ كەلگەن دەگەن ماعىنانى بىلدىرەدى. تولەگەن توقتاروۆپەن بىرگە ماسكەۋدى قورعاۋعا قاتىسقان قازاق، وعان ارنالعان جازۋشى سادىبەك تۇگەلدىڭ «ەرتۋعان» پوۆەسى دە بار. پوۆەست اۆتورىنىڭ ءوزى دە جيەنىنە ءدال وسى ەسىمدى بەرگەن، سونداي-اق دزيۋدودان ۇلكەن جەتىستىكتەرگە جەتىپ جۇرگەن ەرتۋعان تورەحانوۆ، بوكسشى ەرتۋعان زەينۋللينوۆتىڭ ەسىمدەرى بەلگىلى.
ايقاراكوز - «جىگىتتەر» توبىنىڭ ءانشىسى باعلان ءابدىرايىموۆ قىزىنا ءوز توبىنىڭ رەپەرتۋارىنداعى ءدال وسى ءاننىڭ اتىن بەرگەن ەكەن.
لاشىن - سۇڭقار تۇقىمداس جىرتقىش قۇس، قازاقتا قىران مەن سۇڭقاردى ەر- ازاماتتارعا تەلىپ ايتسا، قىزداردى لاشىنعا تەڭەيدى. اقيىق اقىن مۇقاعاليدىڭ جارىنىڭ اتى لاشىن ەكەنى بارشاعا ءمالىم.
ساۋىق - ارابشادان اۋدارعاندا ويىن-كۇلكى، سايران، داڭق دەگەن ماعىنانى بىلدىرەدى. قازاق راديوسىنىڭ ساندۋعاشى اتانعان ساۋىق جاقانوۆانىڭ ەسىمىن كۇللى قازاق بىلەدى.
مەيىرلەن - مەيىرىمدى دەگەندى بىلدىرەدى، «وردا» توبىنىڭ ءانشىسى ەربولات بەدەلحان قىزىنىڭ اتىن وسىلاي قويعان.
ءحانبيبى - حاننىڭ جارى دەگەن ماعىنانى بىلدىرەدى، مارتەبەلى ەسىم. ادەتتە، اقسۇيەك تۇقىمىندا دۇنيەگە كەلگەن قىز بالاعا قويىلادى. قازاق پوەزياسىندا ەرەكشە ورنى بار ءحانبيبى ەسەنقارا قىزىن بىلمەيتىن قازاق جوق شىعار.
ەسمانۇر - اراب تىلىنەن اۋدارعاندا «بيىك ساۋلە» دەگەن ماعىنانى بىلدىرەدى ەكەن. بەلگىلى تەلەجۇرگىزۋشى قازبەك قاسىم قىزىنا ءدال وسىنداي ەسىم بەرگەن.
ەلىمىزدەگى بەلگىلى كومپوزيتور، ءشامشىتانۋشى قالدىبەك قۇرمانالى ءوز بالالارىنىڭ اتىن ءشامشىقالداياق، بەكزاتساتتارحان، مۇحتارشاحان، يمانعاليتاسماعامبەت قويعان.
سونىمەن قاتار ەلىمىزدە بالالارىنا ساياسي نەمەسە كۇندەلىكتى جانۇياداعى وقيعالار مەن سپورتتىق سايىستارعا بايلانىستى ەسىم بەرگەن قازاق وتباسىلارى بارشىلىق. مىسالى، ازيادا اتىن قىز بالاعا دا، ۇلعا دا بەرگەن، ال ۇلدارعا سامميتحان، سامميتبەك، نۇرسامميت، ديپلومبەك سياقتى ەسىمدەر قويىلعان.
دەرەككوز: weproject.kz
