ۇرپاق تاربيەسىندە ۇلتتىق بولمىستى دا ۇمىتپاعان ابزال - ءماجىلىس دەپۋتاتى

استانا. قازاقپارات - ق ر پارلامەنت ءماجىلىسىنىڭ دەپۋتاتى باقىتجان ءابدىرايىمنىڭ ويىنشا، ءبىلىمنىڭ جاڭا مازمۇنىن ەنگىزۋمەن قاتار ۇلتتىق تاربيەنى ۇمىتپاۋ قاجەت، دەپ حابارلايدى قازاقپارات ءتىلشىسى.

«قازىر ەلىمىزدىڭ ءبىلىم بەرۋ سالاسىندا جاقسى رەفورمالار ىسكە اسىپ جاتىر. ارينە، ەلەكتروندى جۇيەلەردى دامىتۋ جولىندا ادامنىڭ كىم بولىپ قالىپتاساتىنىن دا ەستەن شىعارماۋ قاجەت. بىزگە جاقسى مامان قاجەت. وعان قوسا، ول جاقسى ادام بولۋى كەرەك. ال جاقسى ادام دەگەن كىم؟ ول - ءوزىنىڭ ءتىلىن، ءدىنىن قۇرمەتتەيتىن، سالت-ءداستۇرىن بىلەتىن، قازاق ەكەنىن ۇمىتپايتىن ادام. قازىر جاپپاي اقپاراتتىق تەحنولوگيالارعا ۇيرەتەمىز دەپ، بولاشاقتا سول بالادان روبوت جاساپ، ونى ادام رەتىندە جوعالتىپ الماساق بولعانى. اتاقتى ءال-فارابيدىڭ ءوزى بالانىڭ بىلىمىنەن تاربيەسى ارتىق دەگەن بولاتىن. سول سەبەپتەن تاربيە ماسەلەسىن نازاردان تىس قالدىرماۋىمىز قاجەت»، - دەيدى ءابدىرايىم.

ايتا كەتەيىك، بيىلعى جولداۋعا ارنالعان جيىندا «نازاربايەۆ زياتكەرلىك مەكتەپتەرى» ا ق باسقارما ءتورايىمى كۇلاش شامشيدينوۆا «ءبىز بىلمەيتىن» ماماندىقتاردى جاريالادى. ونىڭ سوزىنشە، بۇگىندە رەسەيلىكتەر جاڭا ماماندىقتاردىڭ اتلاسىن ازىرلەپ قويدى. وعان سايكەس، جاقىن ارادا مولەكۋليارلى ديەتولوگ، «ءتىرى جۇيەلەردىڭ» ساۋلەتشىسى، كيبەرپروتەزدەردى ازىرلەۋشى، گ م و اگرونوم، ەنەرگوجۇيەلەر ديزاينەرى، ينتەللەكتۋالدى ەنەرگيا جەلىلەرىنىڭ ينجەنەرى، اقىلدى جولداردى سالۋشى، عارىش تۋريزمى بويىنشا مەنەدجەر، عارىش جولدارىنىڭ ينجەنەرى، روبوتتاردى باسقارۋعا ارنالعان نەيروينەترفەيستەردى جوبالاۋشى، زياتكەرلىك مەنشىكتى باعالاۋشى، ەلەكتروندى كيىم-كەشەك رەتسەپتەرىنىڭ جوبالاۋشىسى، وي-ءورىسىنىڭ پروديۋسسەرى جانە تاعى باسقا ماماندىقتارعا سۇرانىس ارتادى.

اۆتور: ارمان اسقاروۆ