ديماش قۇدايبەرگەن «امەريكا داۋىسىنا» قاتىسادى

استانا. قازاقپارات - قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆانىڭ ايتۋىنشا، ءانشى ديماش قۇدايبەرگەن قىتايداعى حالىقارالىق كونكۋرستان كەيىن «ەۆرو ۆيدەنيەگە» قاتىسادى. سودان كەيىن امەريكاداعى ءان بايقاۋىندا ءوز باعىن سىناپ كورمەك،

 دەپ حابارلايدى قازاقپارات ءتىلشىسى.

 «ءبىزدىڭ ەكىنشى كۋرس ستۋدەنتىمىز - ديماش قۇدايبەرگەننىڭ قىتايدا ەل نامىسىن قورعاپ جۇرگەنىن ءبارىمىز جاقسى بىلەمىز. بۇعان دەيىن ول «جاس قاناتتا»، ودان كەيىن «سلاۆيان بازارىندا» جەڭىمپاز اتانعان. قازىر قىتايداعى حالىقارالىق بايقاۋعا قاتىسىپ جاتىر. ەندى، ءبىز ونى «ەۆرو ۆيدەنيەگە» دايىنداپ جاتىرمىز. سوسىن ول «امەريكا داۋىسىنا» قاتىسادى. بۇگىن ول لوس- اندجەلەس قالاسىنداعى ميۋزيكل- شوۋعا شاقىرۋ الدى»، - دەدى مۇساقوجايەۆا بۇگىن استانادا وتكەن جيىندا.

ايتا كەتەيىك، قازاقستاندىق ءانشى ديماش قۇدايبەرگەن قىتايداعى «I am singer» حالىقارالىق بايقاۋعا قاتىسىپ جاتىر. ءبىرىنشى كەزەڭدە ول فرانسۋز تىلىندەگى ءاندى ورىنداپ، قىتايلىق تىڭدارماندى تاڭقالدىردى. سوڭعى سىندا ءۇشىنشى ورىننان كورىنسە دە، جالپى ۇپاي سانى جاعىنان ءبىرىنشى بولىپ كەلەدى. ديماش كەلەسى ءانىن قىتاي تىلىندە ورىندايتىنىن مالىمدەگەن.

اۆتور: ارمان اسقاروۆ