موڭعوليا استاناسىن قويۋ ءتۇتىن باستى
ويتكەنى، ەلدىڭ ەڭ ءىرى ءوندىرىس وشاقتارىنىڭ جارتىسىنان كوبى وسىندا ورنالاسقان. وعان كولىكتەردىڭ شامادان تىس كوپتىگىن قوسىڭىز. قازىر تۇرعىنداردىڭ دا سانى ارتىپ كەلەدى. ويتكەنى، جۇتتان مالى قىرىلعان شارۋالار جاپپاي ەل استاناسىنا كوشىپ جاتىر. تۇرعىنداردىڭ 67 پايىزى كيىز ۇيلەردە جىلۋسىز تۇرادى. ولاردى جىلىتۋ ءۇشىن 2 ميلليون توننا كومىر كەتەدى. كەيبىر تۇرعىندار قالدىقتاردى وتىن رەتىندە پايدالانىپ ءجۇر. ال، ەل استاناسىنداعى 4 ەلەكتر ستانسياسى جىلىنا 6 ميلليون توننا كومىر جاعادى. وسىنىڭ سالدارىنان قالاداعى ەكولوگيالىق احۋال قاۋىپسىزدىك دەڭگەيىنەن 17 ەسەگە ارتىپ كەتكەن.
سەتيەۆدورج مياگمارتسوگت، قالا تۇرعىنى:
- قالانى باسقان ءتۇتىن ءبىزدىڭ دەنساۋلىعىمىزعا زالالىن تيگىزىپ جاتىر. مەنىڭ بالالارىم قىس تۇسسە بولدى، اۋىرادى. مەنىڭشە، بۇل كۇن رايىنىڭ بۇزىلۋىنان. 2011 -جىلى ەلدە ارنايى زەرتتەۋ جۇرگىزىلگەن ەدى. سوندا انىقتالعانداي، ۇلان- باتىرداعى قازا تاپقان ءاربىر 10- تۇرعىننىڭ ولىمىنە اۋانىڭ لاستانۋى سەبەپ بولعان.
وسىعان كوز جەتكىزگەن جەرگىلىكتى جۇرت نارازالىق شارالارىن جىلدا وتكىزەدى. شەرۋگە شىققاندار ۇكىمەت پەن قالا اكىمشىلىگىنەن ماسەلەنىڭ شەشىمىن تاۋىپ بەرۋدى سۇراپ، تالاپ قىلىپ وتىر.
وتگونتۋيا بالداندورج، قالا تۇرعىنى:
- ءوزىمىز جۇتىپ وتىرعان لاس اۋا دەنساۋلىعىمدى قۇرتىپ بولدى. سوندىقتان مەن ەكى بالامدى الىپ، نارازىلىق شارالارىنا قاتىسۋعا كەلدىم. ءبىرىنشى بالامدى دۇنيەگە اكەلگەننەن كەيىن ءۇش رەت تۇسىك تاستادىم. ءسابيىمدى دۇنيەگە امان- ەسەن الىپ كەلۋ ءۇشىن تازا اۋاعا، اۋىلدىق جەرگە كوشىپ كەتۋىمە تۋرا كەلدى.
قولدان كەلگەنشە ءىس تىندىرۋعا ۇمتىلىپ جۇرگەن ەل بيلىگى تۇيتكىلدى شەشۋ ءۇشىن قىراۋار قارجى بولەدى. ءبىراق، ناتيجە جوق. كەرىسىنشە، جىلدان- جىلعا ۇلان- باتىردى باسقان قارا ءتۇتىن قويۋلانا تۇسكەن. ەندى بيىلدان باستاپ ۇكىمەت كيىز ۇيلەر ورنالاسقان اۋدانداردىڭ ەنەرگوتيىمدىلىگىن ارتتىرۋدى كوزدەپ وتىر. ياعني ءتۇن مەزگىلىندە ەلەكتر قۋاتى تەگىن بولادى.
www.24.kz
