ەل بيلىگىندە وتىرعان اعايىندى شەنەۋنىكتەر كىمدەر - فوتو
90-جىلداردىڭ باس كەزىندە جوعارى ەشەلونعا كوتەرىلىپ العان شەنەۋنىكتەردىڭ ءبىرازى ءالى دە بيلىكتە. ۋاقىت توقتاماي زىرلاپ ءوتىپ جاتىر، ولاردىڭ دا جاسى ۇلعايىپ بارادى. الايدا سول ءۇشىن كوڭىلىنە قاياۋ تۇسكەن شەنەۋنىك از، ويتكەنى ارتىنان ءوز ءىزىن باسقان بالالارى مەن تۋىستارىنان قۇرالعان جاس ۇرپاق باسىپ كەلەدى.
سونىمەن، بۇگىندە مەملەكەتتىك بيلىكتە كىمدەر وتىر؟ قاي شەنەۋنىك كىمنىڭ تۋىسى؟ ارينە، ولاردىڭ بارلىعىن قامتۋ مۇمكىن ەمەس، دەگەنمەن، NUR. KZ پورتالى وقىرماندى قىزىقتىرۋى مۇمكىن دەگەن تۇلعالاردى ءتىزىپ شىقتى.
بىلتىر قورعانىس جانە اەروعارىش ونەركاسىبى ءمينيسترى بولىپ تاعايىندالعان بەيبىت اتامقۇلوۆتىڭ جوعارعى ەشەلوندا باۋىرى ءجۇر. 1974-جىلى الماتى وبلىسى، ۇزىناعاش اۋىلىندا تۋعان ءمادي اتامقۇلوۆ قازاقستان رەسپۋبليكاسى پرەزيدەنتى پروتوكولىنىڭ باستىعى قىزمەتىندە وتىر. ال، اتالاس اعايىنى ەرلان اتامقۇلوۆ 2002-2007-جىلدار ارالىعىندا «قازاقستان تەمىر جولى» ۇلتتىق كومپانياسىن باسقارىپ كەلگەن.
اۋىل شارۋاشىلىعى ءمينيسترى اسقار مىرزاحمەتوۆتىڭ تۋعان ءىنىسى ابىلاي مىرزاحمەتوۆ تە ءبىراز جىلدار مەملەكەتتىك بيلىكتە ءتۇرلى لاۋازىمدا بولدى. قازاقستان تەمىر جولى باسشىلىعىندا بولعان ۋاقىتتا ورىن العان قارجىلىق بىلىقتاردى تەرگەۋگە بايلانىستى ابىلاي مىرزاحمەتوۆ 2002-جىلى ەلباسى جارلىعىمەن كولىك جانە كوممۋنيكاتسيا ءمينيسترى قىزمەتىنەن شەتتەتىلگەن.
باس پروكۋراتۋرا ونى 3,3 ميلليارد تەڭگەنى جىمقىرۋعا تىكەلەي قاتىسى بار دەپ ايىپتادى. جوعارعى سوت شەنەۋنىكتى شارتتى تۇردە بەس جىل باس بوستاندىعىنان ايىرۋ تۋرالى ۇكىم شىعارعان ەدى. بۇگىندە ول «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى قىزمەتىن اتقارىپ وتىر.
سەناتور نۇرتاي ابىقايەۆتىڭ ورتانشى ۇلى سەرگەي نۇرتايەۆ قازاقستاننىڭ يتالياداعى توتەنشە جانە وكىلەتتى ەلشىسى قىزمەتىندە. وسىعان دەيىن ول قازاقستاننىڭ گرەكياداعى ەلشىسى قىزمەتىن اتقارىپ كەلگەن.
ال سەناتور ورالباي ابدىكارىموۆتىڭ ۇلى سەرجان ابدىكارىموۆ - قازاقستاننىڭ چەح جانە سلوۆاك رەسپۋبليكالارىنداعى ەلشىسى.
اقمولا وبلىسىنىڭ اكىمى سەرگەي كۋلاگيننىڭ دە بيلىكتە ءىزباسارى ءوسىپ كەلە جاتىر. وسىعان دەيىن استانانىڭ ەسىل، الماتى، سارىارقا اۋداندارىنا اكىم بولىپ كەلگەن جاس شەنەۋنىك بۇگىندە پرەزيدەنت اكىمشىلىگىنىڭ مەملەكەتتىك ينسپەكتورى قىزمەتىنە اۋىستى.
اقتوبە وبلىسىنىڭ اكىمى بەردىبەك ساپاربايەۆتىڭ باۋىرى نۇرلىبەك نالىبايەۆ 2013-جىلدان بەرى قىزىلوردا قالاسىنىڭ اكىمى قىزمەتىندە.
بۇل ءتىزىمدى ودان ءارى جالعاستىرا بەرۋگە بولادى. قالاي دەسەك تە، ەلدەگى جەتەكشىلىك قىزمەت استانادا وتىرعان باسشىلاردىڭ تۋما-تۋىس، دوس-جورا، بالالارىنىڭ قولىندا شوعىرلانىپ وتىر.
