ءمولدىر اۋەلبەكوۆا: اللا ۇلىق! ديماش ءوز ونەرىن دالەلدەدى

استانا. قازاقپارات - بۇل تۋرالى «ن ت ك» ارناسىنىڭ «ريەۆيۋ» باعدارلاماسىندا ايتىلدى.

«4,5 نەمەسە 5 وكتاۆا داۋىسپەن كۇندە قازاقتىڭ ازاماتى تۋا بەرمەيدى. ول - ءبىزدىڭ قازاعىمىزدىڭ ماڭدايىنا بىتكەن بەدەلدى، دارىندى ازاماتى. ءاربىر جەتىستىگىن ەستىگەن سايىن قۋانىپ وتىرامىن»، - دەيدى داستان ورازبەكوۆ.

قىتايدىڭ «مەن ءانشىمىن» جوباسىندا قوس كۋبوگتى قانجىعاسىنا بايلاعان قۇدايبەرگەنوۆ سوڭعى اينالىمدا ءۇشىنشى ورىندى ەنشىلەدى. وتكەن جىلدىڭ كۇزىندە ىرىكتەۋى باستالعان دوداسىندا باق سىناۋعا نيەتتى ۇمىتكەرلەردىڭ سانىندا شەك جوق. الايدا اتالعان كونكۋرستا ونەر كورسەتكىسى كەلەتىن ۆوكاليستەردىڭ حالىقارالىق دارەجەدەگى ماراپاتى بولۋى ءتيىس. بۇل بايقاۋدىڭ ەڭ كەنجەسى - 22 جاستاعى ديماش ەكەن.

«ەڭ ۇلكەنى - كانادادان كەلگەن تەرەسسا. ءبىراق ءوزى قىتايدىڭ تۋماسى. جاسى 66 دا. ديماشتىڭ مىقتى قارسىلاسى دەپ مەن سول كىسىنى ايتا الامىن. مىسالى، Lion توبى گونكونگتە وتە تانىمال. ولار حالىقارالىق جارىستا ەڭ تازا داۋىسپەن ورىندايتىن مىقتى توپ رەتىندە بەلگىلى»، - دەيدى ءانشىنىڭ مەنەدجەرى.

ال «رينگو» توبىنىڭ ءانشىسى ايان بىربايەۆ وتانداسىمىزدىڭ ستراتەگياسىن ەرەكشە باعالادى. «ديماشقا ءبىرىنشى كۇننەن باستاپ بۇكىل ونەرىن كورسەتپەگەنىنە ريزا بولامىن. ءبىرىنشى كۇنى ول ءوزىنىڭ كىشكەنە عانا بولىگىن كورسەتتى. مۇنى دۇرىس ستراتەگيا دەپ ويلايمىن. 14 تۋر بويى تاڭعالدىرىپ تۇرۋى كەرەك»، - دەيدى ول.

وسى ورايدا، ءمولدىر اۋەلبەكوۆا ءبىر كەزدەرى ديماشتى مويىنداماعان ازاماتتاردىڭ بولعانىن تىلگە تيەك ەتتى. «ديماشتى كەزىندە مويىنداعىسى كەلمەگەن ادامدار بولدى. اللا ۇلىق قوي. ديماش ءوز ونەرىن دالەلدەدى. سابىرلىقپەن ۇندەمەي ءجۇرىپ، بارلىعىن ءوز ورنىنا قويدى»، - دەيدى ءمولدىر اۋەلبەكوۆا.

وتانداسىمىز قاتىسىپ جاتقان بايقاۋدىڭ ءتورتىنشى اينالىمى وسى سەنبىدە، ياعني اقپاننىڭ 11  ءى كۇنى وتەدى.