ۇكىمەت باسشىسى نازاربايەۆ ۋنيۆەرسيتەتىنىڭ الەۋەتىمەن تانىستى

استانا. قازاقپارات - ق ر پرەمەر- ءمينيسترى باقىتجان ساعىنتايەۆ نازاربايەۆ ۋنيۆەرسيتەتىنە بارىپ، ق ر پرەزيدەنتىنىڭ جولداۋىن ىسكە اسىرۋ مەن ونىڭ ۇكىمەتتىڭ كەڭەيتىلگەن وتىرىسى بارىسىندا بەرگەن تاپسىرمالارىن ورىنداۋ ماسەلەلەرى جونىندە كەڭەس وتكىزدى.

 بۇل تۋرالى primeminister.kz سايتىندا حابارلاندى.

نازاربايەۆ ۋنيۆەرسيتەتى - اۋقىمدى عىلىمي- ءبىلىم بەرۋ ەكوجۇيەسى، مۇندا وقىتۋدان بولەك، ءتۇرلى عىلىمي- يننوۆاتسيالىق زەرتتەۋلەر جۇرگىزىلەدى.

ق ر پرەزيدەنتى ءوز جولداۋىندا قازاقستاندا سيفرلىق يندۋستريانى دامىتۋ ەكونوميكانىڭ وزگە سالالارىنىڭ دا دامۋىنا تۇرتكى بولاتىنىن ايتىپ ءوتتى. وسى ورايدا ول نەگىزىندە جاڭا، پەرسپەكتيۆالى تەحنولوگيالار مەن يننوۆاتسيالار بولاتىن ەكونوميكا ءوسىمىنىڭ جاڭا ۇلگىسىن قۇرۋ تۋرالى مىندەت قويدى. وسى ماقساتقا قول جەتكىزۋ ءۇشىن پرەزيدەنت بارلىق مۇمكىندىكتەر مەن رەسۋرستاردى شوعىرلاندىرۋ قاجەتتىگىن ايتتى.

پرەمەر- مينيستر وقۋ ورنىنا نازاربايەۆ ۋنيۆەرسيتەتىنىڭ مەملەكەت باسشىسىنىڭ العا قويعان مىندەتتەرىن ىسكە اسىرۋداعى مۇمكىندىكتەرىمەن تانىسۋ ماقساتىندا باردى.

باقىتجان ساعىنتايەۆ ۋنيۆەرسيتەتتىڭ وقۋ زەرتحانالارىندا بولىپ، ستۋدەنتتەردىڭ عىلىمي جوبالار بويىنشا زەرتتەۋلەر جۇرگىزەتىن ورىندارىنىڭ جاعدايى مەن ونداعى جابدىقتارمەن تانىسىپ شىقتى. ن ۋ- دىڭ تەحنوپاركى مەن وقۋ ورنىنىڭ اينالاسىندا بەلسەندى تۇردە دامىپ جاتقان «Astana Business Campus»  يننوۆاتسيالىق كلاستەرىن ارالاۋ بارىسىندا ول وسىندا جۇزەگە اسىرىلىپ جاتقان زەرتتەۋ جوبالارىنىڭ ناتيجەلەرىمەن تانىستى. سونىمەن قاتار، پرەمەر- مينيستر بيزنەس- ينكۋباتوردىڭ، بيوتەحنولوگيالىق زەرتحانانىڭ جانە «Heart Stitch»، فيزيكا جانە اككۋمۋلياتورلار ينستيتۋتى زەرتحانالارىنىڭ جۇمىسىمەن تانىستى.

كەيىن ب. ساعىنتايەۆ نازاربايەۆ ۋنيۆەرسيتەتىنىڭ پروفەسسور- وقىتۋشىلار قۇرامىمەن كەزدەسۋ وتكىزدى. كەزدەسۋ بارىسىندا ق ر پرەزيدەنتىنىڭ العا قويعان مىندەتتەرىن اتقارۋداعى وقۋ ورنىنىڭ ءرولى تۋرالى ايتىلدى.