مۇحامەدي ۇلى: قازاقستاننىڭ ۋنيۆەرسيادالارعا قاتىسۋ تاريحىندا مۇنداي جەتىستىك بولماعان
ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوزىنىڭ فەيسبۋكتەگى پاراقشاسى ارقىلى سپورتشىلارىمىزدىڭ الماتى ۋنيۆەرسياداسىنداعى جەتىستىكتەرىنە وسىنداي باعا بەردى، دەپ حابارلايدى قازاقپارات.
«دوستار، ۋنيۆەرسيادا-2017 قاتىسۋشى قۇراما كوماندامىزدىڭ جەتىستىكتەرىن ءجىتى قاداعالاۋدامىن. شىنىمدى ايتسام، قۋانىشىمدا شەك جوق! ءبىزدىڭ سپورتشىلار جەڭىستىڭ جوعارى تۇعىرىنان كورىنۋدە. بۇگىن ءبىزدىڭ قورجىنىمىز تاعى ءبىر التىن، ءبىر كۇمىس جانە بەس قولا مەدالمەن تولىقتى. ءبىز ءوزىمىزدىڭ جالپى مەدالدىك ەسەپتەگى ەكىنشى ورنىمىزدى نىقتاي تۇستىك! قازاقستاننىڭ ۋنيۆەرسيادالارعا قاتىسۋ تاريحىندا مۇنداي جەتىستىك بۇرىن-سوڭدى بولماعان جايت! وسى سپورت سالتاناتىنا قاتىستىلاردىڭ ءبارىن شىن جۇرەكتەن قۇتتىقتايمىن! ەرتەڭ تاعى ءبىر جارىس كۇنى، دەمەك، ءبىزدىڭ سپورتشىلاردىڭ جانكۇيەرلەردى مەدالدارمەن قۋانتۋعا مۇمكىنشىلىكتەرى مول! ءبىز سەندەرگە سەنىم ارتامىز، ماقتان تۇتامىز! العا، قازاقستان!»، - دەپ جازدى ارىستانبەك مۇحامەدي ۇلى.
ايتا كەتەيىك، 7- اقپان كۇنى قازاقستان قورجىنى بەس مەدالمەن تولىقتى. «التىن»، «كۇمىس» جانە «قولانى» بياتلونشىلار - گالينا ۆيشنيەۆسكايا، رومان ەرەمين جانە انتون پانتوۆ سايكەسىنشە جەڭىپ الدى. سونداي-اق قولا مەدالداردى شاڭعىشى اننا شيەۆچەنكو، شورت-ترەكشى دەنيس نيكيشا الىپ كەلدى. ناتيجەسىندە، قازاقستان قۇراماسى وسى كۇنگە دەيىن بارلىعى 34 مەدال ەنشىلەدى، ونىڭ 11 - التىن، 7 - كۇمىس جانە 16 - قولا. ءبىرىنشى ورىندا 68 مەدالمەن رەسەي تۇر (27-26-15). ۇزدىك ۇشتىكتى 21 مەدالمەن وڭتۇستىك كورەيا تۇيىقتاۋدا (11-5-5).
