قىتايلىق فاناتتار ديماش قۇدايبەرگەنوۆتى سىيلىقتىڭ استىندا قالدىرۋدا

استانا. قازاقپارات - قىتايلىق فاناتتار ديماش قۇدايبەرگەنوۆتى ءتۇرلى-ءتۇرلى سىيلىقتىڭ استىندا قالدىرۋدا.

 

وسى كۇندەرى اسپان استى ەلىندەگى ءان بايقاۋىنا قاتىسىپ جاتقان وتانداسىمىز قوناق ۇيگە ورالعاندا الدىمەن، سىيلىقتاردى رەتتەپ، حاتتاردى وقۋمەن اينالىسادى ەكەن. جانكۇيەرلەر وعان سىيلىقتاردى كۇندەلىكتى ءۇيىپ-توگىپ اكەلەتىن كورىنەدى.

ولاردىڭ اراسىندا ءدامدى تاعامدار، ديماشتىڭ سۋرەتى بەينەلەنگەن زاتتار، كيىمدەر بار. قازاقستاندىق جاس ءانشىنىڭ ونەرىنە ءتانتى قىتاي حالقى Louis VUTTION مەن ARMANI سىندى ءسان ۇيلەرىنىڭ قىمبات بۇيىمدارىنا دا اقشالارىن اياماۋدا. بۇل تۋرالى ينستاگرامداعى ءوز پاراقشاسىندا ديماش قۇدايبەرگەنوۆتىڭ دوسى ءارى رەسمي وكىلى الپامىس ءشارىموۆ جازدى.

«سىيلىق العاندى كىم بولسا دا ۇنادى! تۋعان كۇن، جاڭا جىل، ءيا بولماسا ناۋرىزدا سىيلىق الىسىپ-بەرىسۋ ءبىزدىڭ داستۇردە بار. قىتايلىق فاناتتار سۇيىكتى ءانشىسىنىڭ ءار كۇنى مەرەكە بولسىن دەگەن نيەتپەن كۇنىگە كوپتەگەن سىيلىقتار جىبەرەدى ەكەن. بۇل ديماشقا تەك ءبىر كۇندە كەلگەن سىيلىقتار، كوبى مىنا سۋرەتكە تۇسپەي قالدى.

سىيلىقتاردىڭ دەنى ءتاتتى دامدەر، ەرەكشە ەسكەرتكىش سىيلىقتاردان باستالىپ Louis VUTTION، ARMANI سىندى برەندتەردىڭ قۇندى اكسەسسۋارلارىنا دەيىن جالعاسادى...

ۇشاقتا دەمالاتىن جاستىق، «Dimash» جازۋى بار برەلوكتار مەن فۋتبولكالار، ءبىز مۇلدەم تۇسىنبەيتىن بىردەمەلەر دە كەزدەسەدى! راسىمەن دە، ونەر ادامى ءۇشىن وسىنداي كوڭىل ءبولۋ شابىتتاندىرادى! قوناق ۇيگە كەلىپ سىيلىقتاردى رەتتەۋ، ديماشقا حاتتاردى وقىپ بەرۋ مەنىڭ مىندەتىم! حاتتار دەمەكشى... حاتتار ءارتۇرلى تىلدە كەلەدى!

 اعىلشىنشا، فرانسۋزشا، قىتاي تىلىندە، ورىسشا... ءبىراق، دەنى قازاق تىلىندە! قاتەلەر بار! ءبىراق، اۋدارماشىمەن قينالماۋ ءۇشىن قازاق تىلىندە جازىلعان، وقۋعا وڭاي، تەز!»، - دەپ جازدى ول.

الپامىس ءشارىموۆ سونداي-اق، ديماشتىڭ اتىنان بارلىق جانكۇيەرلەرگە العىسىن ايتىپ، جىلى ءسوز بەن ءبىر ساتتىك كوڭىل وعان ەرەكشە اسەر سىيلايتىنىن ايتۋدا. ايتا كەتەيىك، قىتاي تەلەارناسىنداعى ءان بايقاۋىنا قاتىسىپ جاتقان وتانداسىمىز ونىڭ ەكى كەزەڭىندە - ءبىرىنشى، ۇشىنشىسىندە 3-ورىن الىپ، جوباعا قاتىسۋىن جالعاستىرىپ كەلەدى. ونىڭ قىتايلىق الەۋمەتتىك جەلىدەگى جازۋشىلار سانى ميلليوننان استى، وعان اقىندار ولەڭ-جىرلار ارناپ، قىزدار قازاقشا ۇيرەنىپ، حاتتار جازۋدا.

جانكۇيەرلەر ءوز پاراقشالارىن ديماشتىڭ سۋرەتتەرىنە تولتىرۋدا. ءتىپتى، قىتاي دۇكەندەرىندە وتانداسىمىزدىڭ كەلبەتى بەينەلەنگەن بۇيىمدار، تۇرمىستىق زاتتار ساتىلا باستادى. ديماشتىڭ ونەرىنە ءتانتى بولعان الەمگە تانىمال ءانشى لارا فابيان ونىمەن كەزدەسكىسى كەلەتىنىن ايتتى. ال كۇنى كەشە عانا بەلگىلى اكتەر، كينورەجيسسەر دجەكي چان د. قۇدايبەرگەنوۆتى كەزدەسۋگە شاقىرىپ، اڭگىمەلەسكەن بولاتىن.

اۆتور: گۇلميرا الياكپاروۆا