قىسقى ۋنيۆەرسيادا: دەنيس نيكيشا ەكىنشى مارتە قولا جۇلدەگەر اتاندى
ەرلەر اراسىنداعى سىندا ا فينالىندا قوس بىردەي قازاقستاندىق دەنيس نيكيشا مەن ايدار بەكجانوۆ كۇش سىناستى. دەنيس قولا جۇلدەنى يەلەنسە، ايدار مارەگە ءتورتىنشى بولىپ كەلدى. التىن مەن كۇمىس مەدال وڭتۇستىككورەيالىقتاردىڭ قانجىعاسىندا كەتتى.
بۇل - د. نيكيشانىڭ وسى ۋنيۆەرسياداداعى ەكىنشى قولاسى. وكىنىشكە قاراي، وسى قاشىقتىقتاعى مىقتىلاردىڭ ءبىرى نۇربەرگەن جۇماعازيەۆكە جارتىلاي فينالدا تورەشىلەر پەنالتي بەرىپ، جارىستان شەتتەتتى. ۋنيۆەرسيادا بارىسىندا نۇربەرگەن وسىلايشا ەكى رەت جازالاندى.
ايەلدەر اراسىنداعى دودادا قازاقستاندىق اناستاسيا كرەستوۆا جارتىلاي فينالدا ونەر كورسەتكەنىمەن، ءوز توبىندا مارە سىزىعىن ءتورتىنشى بولىپ قيىپ، جۇلدەلەر ساراپقا سالىناتىن باس فينالعا شىعا المادى. ال ءمادينا جانبوسىنوۆا مەن قازاقستان ازاماتتىعىن العانىنا ءۇش جىلعا جۋىقتاعان كيم يونگ ا شيرەك فينالدان اسقان جوق.
كيم يوڭ ا ءوز توبىندا مارەگە ءبىرىنشى جەتكەنىمەن، تورەشىلەر ءتارتىپ بۇزدى دەگەن سەبەپپەن وعان دا پەنالتي بەرىپ، بايگە جولىنان شىعارىپ تاستادى. ايتا كەتەيىك، وسى سىننان كەيىن قازاقستاننىڭ ەرلەر جانە ايەلدەر قۇراماسى ەستافەتادان فينالدا جۇلدەلى ورىندار ءۇشىن باسەكەگە تۇسەدى.
جالپى، ەلىمىزدە شورت-ترەكتىڭ دامۋى بۇدان 15 جىل بۇرىن ورالدا جابىق مۇز ايدىنى سارايىنىڭ اشىلۋىمەن بايلانىستى. قازاقستاننىڭ ەڭبەك سىڭىرگەن جاتتىقتىرۋشىسى ءمادىعالي قارسىبەكوۆ باستاعان ماماندار وسى ۋاقىت ىشىندە ەلىمىز قۇراماسىنىڭ نەگىزىن قۇرايتىن شورت- ترەكشىلەردى دايارلاي ءبىلدى. قازىرگى تاڭدا اتىراۋلىق دەنيس نيكيشادان باسقالارىنىڭ بارلىعى دەرلىك بقو- دان تۇلەپ ۇشقان.
مىسالى، 1993 -جىلعى ايدار بەكجانوۆ - قازاقستان قۇراماسىنداعى تاجىريبەلى سپورتشىلاردىڭ ءبىرى. ول قازاق شورتترەكشىلەرى اراسىندا تۇڭعىش رەت 2010 -جىلعى ۆانكۋۆەر وليمپياداسىنا قاتىسىپ، 500 جانە 1 مىڭ مەتر قاشىقتىقتا سىنعا تۇسكەن بولاتىن. سودان كەيىن قۇرامىندا ابزال اجىعالييەۆ، ايدار بەكجانوۆ، نۇربەرگەن جۇماعازيەۆ جانە دەنيس نيكيشا بار قازاقستاندىق تورتتىك سوچي وليمپاداسىندا ەستافەتالىق سىندا بەسىنشى ورىندى يەلەنگەن ەدى.
ال وتكەن جىلى ابزال اجىعاليەۆ پەن نۇربەرگەن جۇماعازيەۆ ايدى اسپانعا شىعارىپ، الەم كۋبوگى كەزەڭدەرىندە جەڭىمپاز اتاندى. وسى ۋنيۆەرسيادانىڭ وزىندە بۇدان بۇرىن جەكەلەي سىندا ا. اجىعاليەۆتىڭ كۇمىس، ن. جۇماعازيەۆ پەن د. نيكيشانىڭ قولا جۇلدەنى يەلەنگەنى بەلگىلى.
اۆتور: ەلجان ەرالى
