ديماشتىڭ «سۇيىكتىسىمەن» تۇسكەن سۋرەتتەرى قىتايلىق جانكۇيەرلەردىڭ اشۋىن تۋدىردى

استانا. قازاقپارات - قىتايدىڭ بەلدى باسىلىمى «حۋانتسيۋ شيباو» «ويىن-ساۋىق» ايدارىندا ديماش قۇدايبەرگەنوۆتىڭ جەكە ءومىرى تۋرالى ماتەريال جاريالادى، دەپ حابارلايدى «قازاقپارات» ح ا ا- نىڭ قىتايداعى مەنشىكتى ءتىلشىسى.

«شىنتۋايتىندا، سىزدەردىڭ كۇيەۋلەرىڭىز ديماشتىڭ (باسىلىم جانكۇيەر قىزداردى كەكەتە ايتۋدا) سۇيىكتىسى بار، ەكەۋىنىڭ قارىم-قاتىناسى دا تاماشا»، - دەپ جازعان باسىلىم، ديماشتىڭ بويجەتكەن قىزبەن قۇشاقتاسىپ وتىرعان سۋرەتتەرىن ورنالاستىرعان.

ولاردىڭ كەيبىرىندە جىگىتتىڭ كەلبەتى جاسىرىلعان. فوتوسۋرەتتەرگە قاراعاندا، ولار نۇرساۋلە اۋباكىروۆانىڭ (nursaule_aubakirova) جەكە پاراقشاسىنان الىنعان. بۇل جاڭالىق قىتايدىڭ الەۋمەتتىك جەلىلەرىندە جاعىمسىز رەاكسيا تۋدىردى.

اشۋعا بۋلىققان جانكۇيەر قىزدار ديماش تۋرالى جالعان اقپاراتتار تاراتپاۋدى سۇراۋدا. ولاردىڭ پايىمىنشا، سۋرەتتەر - ءجاي عانا فوتومونتاج. «سەنە الار ەمەسپىن! مەنىڭ جىگىتىم سونداي سۇلۋ، ارينە، ايەلدەر فوتونى مونتاجداپ، ونى ءوزىنىڭ جانىنا قويا الادى. ونىڭ ۇستىنە، ول جوباعا قاتىسا باستاعاننان بەرى، مەن ونى قىزبەن بىردە-ءبىر رەت كورگەن ەمەسپىن. رەداكتور، نەگىزىندە، سەن جالعان قاۋەسەتتەردى تاراتا وتىرىپ، ءبىزدىڭ كۇيەۋىمىزدىڭ تانىمالدىلىعىن ودان سايىن ارتتىرىپ وتىرسىڭ. ساعان مەنىڭ قولىم جەتپەسە دە، ونىڭ مىڭداعان ايەلى (جانكۇيەرلەر) ەش اياۋسىزدىق تانىتپاستان سەنى قارۋدىڭ بارلىق تۇرىنەن اتىپ تاستايدى»، - دەپ ماتەريالدىڭ استىنا ءوز پىكىرىن قالدىرعان ديماشتىڭ جانكۇيەر قىزدارىنىڭ ءبىرى.

ەسكە سالايىق، ديماش قۇدايبەرگەنوۆتىڭ ونەرىنە تابىنۋشى قىتايلىق قىزدار ونىڭ اۋە رەيستەرىنە بيلەتتەر ساتىپ الىپ، قازاق تىلىندە حاتتار جازۋدا. وسى كۇندەرى قىتاي تەلەارناسىنداعى ءان بايقاۋىنا قاتىسىپ جاتقان وتانداسىمىز ونىڭ ەكى كەزەڭىندە - ءبىرىنشى، ۇشىنشىسىندە 3-ورىن الىپ، جوباعا قاتىسۋىن جالعاستىرىپ كەلەدى.

ونىڭ قىتايلىق الەۋمەتتىك جەلىدەگى جازۋشىلار سانى ميلليوننان استى، وعان اقىندار ولەڭ- جىرلار ارناپ، قىزدار قازاقشا ۇيرەنىپ، حاتتار جازۋدا. جانكۇيەرلەر ءوز پاراقشالارىن ديماشتىڭ سۋرەتتەرىنە تولتىرۋدا. ءتىپتى، قىتاي دۇكەندەرىندە وتانداسىمىزدىڭ كەلبەتى بەينەلەنگەن بۇيىمدار، تۇرمىستىق زاتتار ساتىلا باستادى. ديماشتىڭ ونەرىنە ءتانتى بولعان الەمگە تانىمال ءانشى لارا فابيان ونىمەن كەزدەسكىسى كەلەتىنىن ايتتى. ال كۇنى كەشە عانا بەلگىلى اكتەر، كينو رەجيسسەر دجەكي چان د. قۇدايبەرگەنوۆتى كەزدەسۋگە شاقىرىپ، اڭگىمەلەسكەن بولاتىن.

اۆتور: گۇلميرا الياكپاروۆا