تۇركيا اۋرۋحانالارىندا وتانى روبوتتار جاسايدى

استانا. قازاقپارات - تۇركيا الەمدە ە ك و جاساۋ (جاتىردان تىس ۇرىقتاندىرۋ) بويىنشا ءبىرىنشى ورىندى يەمدەنەدى.

بۇل باعىتتا ىستانبۇل قالاسىندا - 3، انتاليا شاھارىندا 3 كلينيكا مەن 2 مەديتسينالىق ورتالىق جۇمىس ىستەيدى. مۇندا سونداي-اق، وتالار روبوتتاردىڭ كومەگىمەن جاسالادى. بۇگىنگە دەيىن جوعارعى تەحنولوگيامەن روبوتتاندىرىلعان 6 مىڭنان استام گينەكولوگيالىق وتا ءساتتى جۇزەگە اسىرىلعان.

بۇل تۋرالى كەشە و ق و ايماقتىق كوممۋنيكاتسيالار قىزمەتىندە وتكەن بريفينگتە انتاليا قالاسىنا تاجىريبە الماسۋ ماقساتىندا بارعان مەديتسينا سالاسىنىڭ ماماندارى مالىمدەدى. وبلىستىق ەندوكرينولوگيا ديسپانسەرىنىڭ دارىگەر-ساراپشىسى، توپ باسشىسى قالكوز قاسىمبەكوۆانىڭ ايتۋىنشا، و ق و اكىمى ج. تۇيمەبايەۆتىڭ تاپسىرماسىمەن تۇركياعا تاجىريبە الماسۋعا بارعان 15 مەديتسينا قىزمەتكەرى انتاليا قالاسىندا بولعان.

ولار 6 كلينيكانى ارالاپ كورىپ، ءىس-تاجىريبە الماستى. انتاليادان 80 شاقىرىم جەردەگى يسپارتا قالاسىنداعى اۋرۋحانادا بولدى. تۇرعىندارعا جوعارى مامانداندىرىلعان كومەك كورسەتەتىن مەديتسينالىق قۇرىلىمداردىڭ جۇيەلەنگەن جۇمىستارىمەن تانىسىپ، كوروناروانگيوگرافيالىق، كلينيكا-دياگنوستيكالىق، رەنتگەن-اريتمولوگيالىق زەرتحانالارى مەن ناۋقاستاردى قابىلداۋ بولىمدەرىنىڭ جۇمىسىن كوردى.

تۇراقتى ەلەكتروكارديوستيمۋلياتورلار، كارديوۆەرتەر-دەفيبريللياتور، سرت -قۇرىلعىلارى ورناتىلعان كارديولوگيا سالاسىندا كورونوگرافيا، ستەنتتەۋ وتالارى ا ق ش تاجىريبەسىمەن جۇرگىزىلەدى. سول سياقتى جەكەمەنشىك 120 ادامعا ارنالعان «OZEL OFM» كلينيكاسىندا ءبىر ايدا 30 ادامنىڭ جۇرەگىنە وتا جاسالادى ەكەن، دەپ حابارلادى وڭتۇستىك قازاقستان وبلىسى اكىمدىگىنىڭ باسپا ءسوز قىزمەتىنەن.

وبلىستىق كارديوورتالىق اۋرۋحاناسى باس دارىگەرىنىڭ ورىنباسارى اينۇر بالابايەۆانىڭ ايتۋىنشا، بىزدە ناۋقاستار اۋرۋحاناعا جاتىپ ەم قابىلداۋدى ءجون كورسە، تۇرىك اعايىندار پالاتادا جاتىپ ەمدەلۋدى قالامايدى. سەبەبى، ولار اۋىرعاننان گورى ونىڭ الدىن الۋعا كوبىرەك بەيىمدەلگەن. ۋاقىتىلى مەديتسينالىق تەكسەرۋلەردەن ءوتىپ تۇرادى.

انتاليا قالاسىنداعى «Training Hospital» كلينيكاسى 904 ناۋقاسقا ارنالعان. قاجەت بولعان جاعدايدا كەڭەيتىلەدى، 2200 ادامدى قابىلداۋعا مۇمكىندىگى بار. مۇندا 2016-جىلى 2,5 ميلليون ناۋقاس ەم قابىلداعان بولسا، سونىڭ 1,5 ميلليونعا جۋىعى شەتەلدىكتەر بولعان.

«تۇركيادا بىزدە ەندى-ەندى قولعا الىنىپ جاتقان سۇيەك كەمىگى ناۋقاستارىنا ترانسپلانتاتسيالاۋ وتالارى كوپتەپ جاسالادى ەكەن. ترانسپلانتولوگيا وتە قاتتى دامىعان. ءاربىر ازاماتى - تەگىن دونور. كولىك جۇرگىزۋشى كۋالىگىن الار كەزدە ولار سانالى تۇردە وزدەرىنىڭ اعزاسىنداعى ءبىر مۇشەسىن دونور رەتىندە بەرۋگە كەلىسىم بەرەدى. اتالعان كەلىسىم بەلگىسى جۇرگىزۋشى كۋالىگىندە كورسەتىلەدى.

ەگەر ول جول اپاتىنان قايتىس بولسا، مەديتسينا ماماندارى شۇعىل تۇردە ىسكە كىرىسىپ، زاقىمدانباعان ساۋ مۇشەسىن قاجەت ەتەتىن ناۋقاسقا تەگىن اۋىستىرىپ سالادى. دونور تاپشىلىعى جوق»، - دەيدى قالكوز باقىت قىزى.

انا بولۋدى جوسپارلاۋ جۇيەلى تۇردە جۇزەگە اسادى. تۇسىك جاساۋعا مەملەكەتتىك دەڭگەيدە قاتاڭ تىيىم سالىنعان. ايەلدىڭ ومىرىنە قاۋىپ تونەتىندەي جاعداي بولماسا، مۇلدەم رۇقسات ەتىلمەيدى.