قايرات نۇرتاس: ديماش ءوز ءانىن تاپپاعاندىقتان ەلدە باعالانبادى
ول ديماشتىڭ اسپان استى ەلىندەگى العاشقى ونەرىن كورگەن كەزدە كوزىنە جاس العان. سونداي- اق، تانىمال ءانشىنىڭ ايتۋىنشا، جاس دارىن ءوز ءانى مەن ستيلىن تاپپاعاندىقتان تۋعان ەلىندە تيىستى دارەجەدە باعالانباي كەلۋى مۇمكىن، دەپ حابارلايدى Baq.kz ءتىلشىسى.
«ديماشجاندى مەن بەس-التى جىلدان بەرى تانيمىن. اكەسىن دە، اناسىن دا قاتتى سىيلايمىن، جاقسى كورەمىن. ديماشتىڭ قىتايدا ءبىرىنشى شىققانىن ينتەرنەتتەن كورگەن كەزدە مەنىڭ كوزىمە جاس كەلدى. قاتتى قۋاندىم. قازاقتى مويىنداتىپ جاتىرمىز. از عانا حالىقپىز. قىتايدى ديماشجان جىلاتىپ جاتىر. قازاقتىڭ ماڭدايىنا جازىلعان وسىنداي ۇلدىڭ بارىنا قۋانامىن. ارتىمىزدا وسىنداي جىگىتتەر شىعىپ، كوتەرىلىپ جاتسا، اتاقتى بولىپ جاتسا، باسقا ەلگە ءبىزدى تانىتىپ جاتسا، نەگە قۋانباسقا؟ باۋىرىما تەك قانا ساتتىلىك تىلەيمىن»، - دەپ جاۋاپ بەردى قايرات نۇرتاس.
قايرات نۇرتاس «ديماش ءوز ەلىندە باعالانباي، ەسەسىنە شەتەلدىكتەر ونىڭ ونەرىن جوعارى باعالاپ جاتىر» دەگەن پىكىرگە قاتىستى ءوز ويىن ءبىلدىردى.
«ءوسىپ كەلە جاتقان مىقتى جاستار بار، ونەرلى ازاماتتار بار. ولاردىڭ قازاقستاندا شىعۋى وتە قيىن. سەبەبى، كوپ قارجى كەرەك، وقىپ، ءبىلىم الۋ كەرەك. اقشا جەتپەي، اۋىلدا ءجۇرىپ قالاتىن ونەر ادامدارى بار. ال ديماش بۇرىننان كورىنىپ جۇرگەن جىگىت. مەن بۇرىننان كورىپ، داۋسى ۇناپ ءجۇردى. ءبىراق مۇمكىن سول كەزدە ءوزىنىڭ ءانىن، ستيلىن تاپپاعان شىعار. قىتايعا باردى، مىنە، بارىنە كورىندى. ەندى باعالاپ جاتىر. مەن ءوزىنىڭ ءانىن تاپپاعاندىقتان شىعار دەپ ويلايمىن»، - دەدى ءانشى.
قايرات نۇرتاس جەتكىزگەندەي، وسى جازدا ديماش ەكەۋىنىڭ اقتوبەدە كەشى بولۋى مۇمكىن.
«حالىققا ارناپ قايىرىمدىلىق كەشىن وتكىزەمىز دەگەن ويىمىز بار. بۇل تۋرالى اقتوبەدە ديماشتىڭ اكەسىمەن سويلەسكەن بولاتىنبىز»، - دەدى ول.
