الەۋمەتتىك جەلىدە تاراعان قاۋىپتى ويىننان بالاڭىزدى قورعاڭىز

استانا. قازاقپارات - سوڭعى ۋاقىتتا الەۋمەتتىك جەلىدە سۋيتسيدكە يتەرمەلەيتىن «كوگىلدىر كيت»، «تىنىش ءۇي» سىندى قاۋىپتى توپتار پايدا بولدى.

وسىعان وراي ق ر ىشكى ىستەر مينيسترلىگى اتا-انالارعا بالالارىنىڭ الەۋمەتتىك جەلىدەگى ءىس- ارەكەتىنە باقىلاۋدى كۇشەيتۋدى وتىنەدى، دەپ حابارلايدى قازاقپارات.

مۇنان بولەك، قازاقپارات تىلشىسىنە وسى جايتتارعا قاتىستى تۇسىنىك بەرگەن ق ر ءى ءى م مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ مۇنداي فاكتىلەر ورىن العان جاعدايدا پوليتسياعا حابارلاسۋعا كەڭەس بەرۋدە.

«سوڭعى ۋاقىتتا ءوزىن ءوزى ولىمگە باس تىگۋىن ناسيحاتتايتىن «كوگىلدىر كيت»، «تىنىش ءۇي» سىندى توپتار الەۋمەتتىك جەلىدە كەڭىنەن تاراۋدا. جاسوسپىرىمدەردى ويىنعا تارتادى، ال سوڭى ءوز وزىنە قول جۇمساۋمەن اياقتالادى. بۇل رەتتە ويىن مودەراتورىندا بۋىنى ءالى قاتپاعان بالا پسيحولوگياسىنا اسەر ەتەتىندەي اقپاراتتار بار. مۇنداي ارەكەتتەر ق ر ق ك 105 -بابى 2 -تارماعى بويىنشا جاۋاپكەرشىلىككە تارتۋعا سەبەپ بولادى»، - دەدى سادۋبايەۆ.

ونىڭ مالىمەتىنشە، وتكەن جىلى كامەلەتكە جاسى تولماعانداردى ءوز وزىنە قول جۇمساۋ جاعدايىنا جەتكىزۋگە قاتىستى 9 قىلمىستىق ءىس قوزعالعان. ءبىراق، ول جايتتارعا قازىرگى ۋاقىتتا الەۋمەتتىك جەلى ارقىلى تاراعان ويىننىڭ قاتىسى جوق.

«الەۋمەتتىك جەلىلەر شەتەلدىك تەحنيكالىق الاڭداردا بولۋىنا بايلانىستى مۇنداي رەسۋستارعا كىرۋگە توسقاۋىل قويۋ ناقتى شارالاردىڭ ءبىرى بولىپ وتىر. بالالار اراسىنداعى سۋيتسيدتىڭ الدىن الۋ ماقساتىندا اتا-انالاردان بالالارىنىڭ ۆيرتۋالدى ومىردەگى ءىس-ارەكەتىنە باقىلاۋدى كۇشەيتۋدى جانە مۇنداي جايتتاردى دەرەۋ پوليتسياعا حابارلاۋدى وتىنەمىز. مۇنداي كەلەڭسىز وقيعا ورىن العان جاعدايدا بىردەن سايكەسىنشە شارالار قابىلداناتىن بولادى»، - دەدى الماس سادۋبايەۆ.

اۆتور: مارلان جيەمباي