قازاقستاندىق كەيبىر قىزدار جەلىدە نەگە جالاڭاشتانادى؟ پسيحولوگتىڭ جاۋابى
ماماندار Tengrinews.kz تىلشىسىنە بەرگەن سۇحباتىندا جالاڭاش سۋرەتتەرگە قۇمار الەۋمەتتىك جەلى قولدانۋشىلارى مەن وزگەلەردىڭ ينتيم سۋرەتتەرىن جاريالاۋعا اۋەس ادامداردىڭ وسىنداي ارەكەتتەرگە نەلىكتەن باراتىنىن ءتۇسىندىرىپ بەردى.
پسيحولوگتار اسسوتسياتسياسىنىڭ پرەزيدەنتى ۆلاديمير ستەبليانكونىڭ ايتۋىنشا، ادامدار ينتيم سۋرەتتەردى وزدەرىن جارنامالاۋ ءۇشىن جاريالايدى.
«بۇل جەردە ادامنىڭ بىرنەشە ماقساتى بولۋى مۇمكىن. ءبىرىنشىسى - ءوز-ءوزىن جانە سۇلۋلىعىن جارنامالاپ، الەۋمەتتىك پوزيتسياسىن كورسەتۋ. مۇمكىن ولار سولاي تانىمال بولىپ، اقشا تابۋدى كوزدەيتىن شىعار. سونداي-اق، ولار بىرەۋدىڭ سۋرەتى ارقىلى اقشا تاپقىسى كەلەدى. ول ادام ينتيم سۋرەتتى يەسىنەن رۇقسات سۇراپ الۋى مۇمكىن نەمەسە ۇرلاپ الۋى دا مۇمكىن. بۇل جەردە ونىڭ باستى ماقساتى - جارنامامەن اقشا تابۋ. تاعى دا باسقا ماقساتتار بار. مىسالى، قوعامدا وزدەرىن ويداعىداي كورسەتە المايتىن ادامدار بولادى. سول كەزدە ادام وسىنداي جولمەن ارەكەت ەتە باستايدى. (...). ەگەر ادام الەۋمەتتىك تۇرعىدا تولىققاندى بولماسا، ول ءوزىن دەنەسى ارقىلى كورسەتە باستايدى»، - دەدى پسيحولوگ ۆلاديمير ستەبليانكو.
ال پسيحواناليز ينستيتۋتىنىڭ ديرەكتورى اننا قۇدياروۆانىڭ ايتۋىنشا، بۇل جەردە ەكى تۇسىنىك بار: ەكسگيبيوسيونيزم مەن ۆۋايەريزم. ياعني، جالاڭاش دەنەسىن كورسەتۋگە اۋەس ادامدار مەن ولاردىڭ سۋرەتتەرىن باقىلاپ وتىراتىن ادامدار.
«قازىر ادامدار ولاردىڭ جالاڭاش دەنەسىن بىرەۋلەردىڭ كورگەنىن قالايدى. ەگەر ادام مۇنى سيرەك قالايتىن بولسا، ءبىز بۇل پروتسەستى ەكسگيبيوتسيونيزم دەپ اتايمىز. ال ەگەر دە بۇل ودان ارى اسقىناتىن بولسا، جالاڭاش دەنەسىن كورسەتۋگە اۋەس ادامدار پسيحياترعا نەمەسە پسيحوساراپشىلارعا كورىنۋ كەرەك (...). سونداي-اق، وزگەلەردىڭ ينتيم سۋرەتتەرىن قاراپ وتىرۋعا قۇمار ادامدار دا بار. ولاردى ۆۋايەريستەر دەپ اتايمىز. ياعني، ءبىرىنشى توپتاعى ادامدار جالاڭاش دەنەلەرىنىڭ سۋرەتتەرىن الەۋمەتتىك جەلىلەرگە جۇكتەي وتىرىپ، لايك جيناپ وتىرادى. ءتىپتى ول سۋرەتتەرگە جاعىمسىز پىكىر قالدىرىلسا دا، بۇل ادامدار ونى قالىپتى جاعداي دەپ سانايدى. ال ۆۋايەريستەر بولسا، بىرەۋلەردىڭ ينتيم سۋرەتتەرىن جاريالاپ، باسقا ادامدارمەن بىرگە سونى قاراپ وتىرعاندى ۇناتادى»، - دەدى اننا قۇدياروۆا.
اننا قۇدياروۆانىڭ ايتۋىنشا، الەۋمەتتىك جەلىلەردەگى مۇنداي سۋرەتتەردىڭ تاعى ءبىر سەبەبى ادامنىڭ جالعىزدىعى بولۋى مۇمكىن.
«الەۋمەتتىك جەلىلەر قولجەتىمدى بولعاندىقتان "الەۋمەتتىك" دەپ اتالادى. راسىندا دا ناعىز بوستاندىق سوندا. مىسالى، 20 جاستاعى قىز الەۋمەتتىك جەلىلەرگە ينتيم سۋرەتتەرىن جۇكتەدى. ونىڭ اتا-انالارىنا بۇل قانداي اۋىرتپاشىلىق بولاتىنىن ويلاپ كورىڭىزدەرشى. نەمەسە 35-40 جاستاعى ەر ادام جالاڭاش سۋرەتتەرىن سالاتىن بولسا، ونىڭ وتباسى مەن بالالارى وسى جاعدايعا قالاي قارايدى؟ مىنە، وتباسىنداعى جانجالدار وسى جەردەن باستالادى. مىسالى، جاسوسپىرىمدەر، جىگىتتەر مەن قىزدار وسىنداي ينتيم سۋرەتتەردى جاريالادى دەلىك. بۇل دەگەنىمىز ولار اتا- انالارىمەن جاقىن قارىم- قاتىناستا ەمەس. ولار اتا- انالارىنا ايتا المايتىن دۇنيەلەردى الەۋمەتتىك جەلىلەرگە جۇكتەيدى»، - دەدى پسيحواناليز ينستيتۋتىنىڭ ديرەكتورى.
ەسكە سالا كەتەيىك، وسىعان دەيىن وقىرماندار استانادا ءزاۋلىم ءۇيدىڭ اۋلاسىندا ينتيم فوتوسەت جاساعان قىزدىڭ سۋرەتىن جولداعان بولاتىن. پوليتسەيلەردىڭ مالىمەتىنشە، بۇل وقيعا 31 -قاڭتاردا شامامەن ساعات 20.30-دا قالداياقوۆ كوشەسىندە ورنالاسقان ءۇيدىڭ كولىك تۇراعىندا بولعان. وسىعان بايلانىستى استانانىڭ 20 جاستاعى تۇرعىنى جاۋاپكەرشىلىككە تارتىلعان بولاتىن.
