ديماش قىتايلىق ءانشى قىزعا باۋىر باسىپ قالعاندىعىن ايتتى - كەسكىن
بايقاۋدىڭ 3- كەزەڭىندە قىتاي ەلى اتىنان قاتىسىپ جاتقان تانىمال ءانشى يۋان يا ۋي كەلەسى اينالىمعا وتە الماي، جوبامەن قوشتاسۋعا تۋرا كەلدى. وسى ساتتە ارىپتەسىنە جىلى سوزدەر ارناپ، باۋىرمالدىق تانىتقان ديماش قۇدايبەرگەنوۆتىڭ ارەكەتى قىتايلىقتاردىڭ جۇرەگىن ەلجىرەتىپ جىبەردى.
«مەن جوباعا العاش كەلگەندە، بۇل ورتادا ەشكىممەن تىلدەسە الماي قۇلازىپ جۇرەتىن شىعارمىن دەپ ويلاعان ەدىم. يۋان يا ۋي مەنى كورە سالىپ بىردەن تانىسىپ، اڭگىمەلەسىپ، اشىق جارقىن مىنەز تانىتتى. وسى از ۋاقىتتىڭ ىشىندە ءبىز ءبىر-بىرىمىزگە باۋىر باسىپ قالدىق»، - دەپ اعىنان جارىلدى ديماش.
سونىمەن بىرگە ديماش قۇدايبەرگەنوۆ قىتايلىق انشىگە جىگەر بەرىپ، ونى قۇشاقتاپ، «سەن وتە مىقتى ءانشىسىڭ! مەن سەنى جاقسى كورەمىن!» دەپ، بەتىنەن سۇيگەن بولاتىن. بۇگىندە بەينە جازبا قىتايلىق الەۋمەتتىك جەلىلەردە كەڭىنەن تارالىپ، جۇرتتىڭ قىزۋ تالقىسىنا تۇسۋدە. ديماشتىڭ جانكۇيەرلەرى ونىڭ مەيىرىمدىلىگىنە، باۋىرمالدىعىنا ەرەكشە ريزاشىلىعىن ءبىلدىرىپ، پىكىر قالدىرۋدا.
«ول شىنىمەن مەيىرىمدى جان ەكەن! ەرەكشە اسەرلەندىردى. «ونىڭ قۇشاقتاعانىن كورىپ جىلادىم»، «بۇل قازاق حالقىنا ءتان باۋىرمالدىلىق»، «مەن قىزعانىپ تۇرمىن، سوڭىندا ديماشتىڭ قۇشاقتاعانىن كورىپ، كوزىمنەن جاس توقتار ەمەس»، «يۋان يا ۋي، سەن نەتكەن باقىتتىسىڭ! ديماشتىڭ قۇشاقتاعان جىلۋىن سەزىندىڭ. ەرەكشە اسەرلى» دەگەن سىندى پىكىرلەر جازدى جەلى قولدانۋشىلارى. بەينەجازبادا جوباعا قاتىسۋشى باسقا انشىلەردىڭ دە يۋان يا ۋي تۋرالى جۇرەك جاردى سوزدەرى بەرىلگەن.
اۆتور: ريزابەك نۇسىپبەك ۇلى
