جاپوندار كۇيزەلگەن ادامدى جورگەككە وراپ ەمدەيدى

 استانا. قازاقپارات -  جاپوندار كۇيزەلىستەن ارىلۋدىڭ جاڭا ءتاسىلىن ويلاپ تاپتى. وتوناماكي دەپ اتالاتىن بۇل ءادىس جاپونشا جورگەككە وراۋ دەگەندى بىلدىرەدى. كۇيزەلىستەن ارىلعىسى كەلگەن ادامداردى ۇلكەن جورگەككە بولەيدى. بۇل تۋرالى "ورتالىق ازيا حابار قىزمەتى" جازادى.

جاڭا ءادىستى جاقتاۋشىلار بۇل تاسىلمەن كۇيزەلىستەن ارىلۋعا بولاتىنىن ايتادى. ادامنىڭ بۇلشىق ەتتەرى مەن سۇيەكتەرى بوساپ، شارشاعانى باسىلادى. "ەمدەۋ شاراسىن قابىلداعان سوڭ، شارشاعانىمىز باسىلدى. ءبىز جورگەككە ورالعان بالانىڭ نەگە تىنىش ۇيىقتايتىنىن تۇسىندىك. بۇل ءادىستىڭ جاڭا تۋعان انالارعا كومەگى كوپ، ويتكەنى ولاردىڭ بەلى مەن يىعى اۋىرادى"، - دەدى وسى ءتاسىلدى قولدانۋشىلاردىڭ ءبىرى.

جاس انالارعا كومەك ۇيىمداستىرۋشى توكيولىق ۇيىم جاڭا ءتاسىلدى قولدانىپ كورگىسى كەلگەندەرگە جاتتىعۋ وتكىزدى. ماماندار جاس انالارعا ءبىر ءبىرىن جورگەككە وراۋدى ۇيرەتتى. ول ءۇشىن جاتىرداعى نارەستە سياقتى ارقالاپ جاتۋ كەرەك. ماتانى ادامعا اينالدىرا ورايدى. ونى جايمەن تەربەيدى. بۇل بۇلشىق ەتتىڭ بوساۋىنا كومەكتەسەدى.

دەگەنمەن كەيبىر مەديتسينالىق قىزمەتكەرلەر بۇل ءادىستىڭ پايداسى بارىنا سەنبەيدى. "استماسى بارلاردى وسىلاي وراسا، ولار جەڭىل تىنىستايدى. ءبىراق ونىڭ ەمدىك پايداسى جوق"، - دەيدى دارىگەرلەردىڭ ءبىرى. بۇعان قوسا دارىگەرلەر جاڭا ءتاسىلدى ارقاسى اۋىراتىندارعا جاساپ كورۋدىڭ قاجەتى جوقتىعىن ەسكەرتەدى.

http://qazaqtimes.kz/