ساپيەۆ: جارىسقا ارناپ سالىنعان نىساندار - ۋنيۆەرسيادانىڭ ەڭ ۇلكەن مۇراسى

استانا. قازاقپارات - اتلەتتەر اۋىلىنىڭ اكىمى سەرىك ساپيەۆ ۋنيۆەرسيادانىڭ بارىسى مەن ءوزىنىڭ جاڭا قىزمەتى تۋرالى ايتىپ بەردى.

 - ازىرگە بىردەمە ايتۋ قويۋ ەرتەرەك قوي، ءبىراق ءسىزدىڭ مىنا سپورتشىلار اۋىلىنداعى جۇمىسىڭىزعا كوڭىلىڭىز تولا ما؟

 - كوپ ءىس تىندىردىق. سپورتشىلاردىڭ ءارقايسىسىن ءبىز جاقسىلاپ قارسى الدىق. مىنا اتلەتتەر اۋىلىندا ولارعا كەرەكتى جاعدايدىڭ ءبارى جاسالعان. ەلىمىزگە كەلگەندەردى قازاقستاننىڭ مادەنيەتىمەن تانىستىرىپ، مۇراجايعا الىپ بارۋعا دا ۋاقىت تاۋىپ جاتىرمىز. كەيىن ولار الماتىنىڭ وسى ءبىر قوناقجاي قاسيەتىن ۇزاق ۋاقىتقا دەيىن ەسكە الىپ جۇرەتىن بولادى.

 - كۇندە تاڭەرتەڭ قانشادا تۇراسىز؟

 - تاڭەرتەڭ 8.30-دا تۇرامىن دا، اتلەتتەر اۋىلىن اينالىپ شىعىپ، ءبارى امان- ەسەن ەكەنىنە كوز جەتكىزىپ قايتامىن. مەنىڭ بولمەم اسحانانىڭ قاسىندا تۇر. ەڭ الدىمەن سوندا كىرىپ، سپورتشىلاردىڭ قارنى توق پا، جوق پا، سونى بىلەمىن. سوسىن كورپۋستارعا كىرىپ، مادەني ورتالىقتا سپورتشىلارمەن كەزدەسەمىن.

 - ۋنيۆەرسيادانىڭ الماتى مەن قازاقستاننىڭ قاراپايىم تۇرعىندارىنا قانداي پايداسى بار؟

 جارىسقا ارناپ سالىنعان نىساندار - ۋنيۆەرسيادانىڭ ەڭ ۇلكەن مۇراسى. ولار حالىققا قالادى. سپورت نىساندارىندا ۇيىرمەلەر اشىلىپ، اتلەتتەر اۋىلى جارىس بىتكەندە مەملەكەتتىك باعدارلامامەن تۇرعىندارعا بەرىلەدى. بۇل ءبىر ۇلكەن اۋدان، ءومىر سۇرۋگە قولايلى جاعدايدىڭ ءبارى جاسالعان.

 - ال ەندى، ۋنيۆەرسياداعا تارتىلعان ادامدار قانداي پايدا كوردى؟

 - ەڭ الدىمەن جارىس وتكىزۋدەن تاجىريبە جينادىق. باسشىلارىمىز وسى جۇمىستى تالقىلاپ، ساراپتاپ شىعادى. كەيىن تاعى ءبىر جارىس وتكىزەر كەزدە وسىنىڭ ءبارى كادەگە جارايدى.

 - اتلەتتەر اۋىلىنداعى سپورتشىلار ءۇشىن نە ىستەلدى؟

 - ءوزىم دە سپورتشىمىن عوي، سوندىقتان ولاردى ءبىر كىسىدەي جاقسى تۇسىنەمىن. سوندىقتان قولدان كەلگەنشە ولاردىڭ كوڭىلىنەن شىعۋعا تىرىسىپ، بارلىق جاعدايدى جاسادىق. ولاردىڭ باسىنداعى جاعداي مەنىڭ دە باسىمنان ءوتتى. ايتپاقشى، ۋنيۆەرسياداعا مەن العاش رەت قاتىسىپ وتىرمىن. بىردەن باسشى قىلىپ جىبەردى.

 - قازىرگى جاس سپورتشىلاردىڭ بويىندا قانداي ەرەكشەلىك بار؟

 - قازىر الەمدە سپورت جان- جاقتى دامىپ كەلەدى. سپورتشىلارعا ارنالعان باعدارلامالار جاسالىپ، باسقا دا تۇرلەرىنە ماشىقتاندىراتىن ۇيىرمەلەر مەن ۇيىمدار كوپ. قازىرگى سپورتشىلار اقىلدىراق سەكىلدى بولىپ كورىنەدى. قايتكەنمەن جاڭا تەحنولوگيانىڭ زامانى عوي. جاس سپورتشىلاردىڭ كوبى ءتىل ۇيرەنۋگە تالپىنادى. كەزىندە ءبىز شەتەلدىك دوستارىمىزبەن ىمداسىپ سويلەسەتىنبىز. قازىر ونداي نارسە جابايىلىق سياقتى كورىنەدى.

 - سپورتشىلار اۋىلىنداعى قىزمەتىڭىز نە ۇيرەتتى؟

 - جاعدايدى بارىنشا باقىلاۋدا ۇستاپ، كوپشىلىكپەن جۇمىس ىستەۋدى، مەنەدجەنتتى ۇيرەتتى. بۇرىن مەن اتلەتتەر اۋىلىن سىرتىنان عانا كورەتىمىن. قازىر ەندى ونىڭ ىشكى الەمى با ەكەنىن، وندا بۇرىن بايقاماعان قانشاما جۇمىس بولاتىنىنا كوز جەتكىزىپ جاتىرمىز. قىسقاشا ايتقاندا، كوكجيەگىم كەڭەيىپ، ج ك و پ نارسەگە كوزىم اشىلدى.

 - اتلەتتار اۋىلىندا قانداي نارسە ەسىڭىزدە قالدى؟

 - قازاقستان دەلەگاتسياسىن كەلگەن كەزى مەنىڭ ەڭ ەسىمدە قالعان ءسات بولدى. ارىپتەستەرىمە ورتالىقتىڭ مادەني- ساۋىق ورتالىعىن كورسەتىپ، حوككەي دە ويناپ كوردىك. كۇلىپ، ازىلدەسىپ، قاۋقىلداسىپ قالدىق. ولاردىڭ كىشكەنە بولسا دا سەرگىپ قالىپ، اشىلىپ سويلەسكەنىن قالادىم. ودان كەيىنگى ەستەن قالعان تاعى ءبىر جاعداي- جارىسقا قاتىسقان ەلدەردىڭ تۋى كوتەرىلگەن ءسات بولدى. باستىق بولعاننان كەيىن كوپشىلكتىڭ الدىنا شىعۋعا تۋرا كەلدى. ادامدى تولقىتاتىن سونداي ءبىر اسەرلى شاق بولدى. ءبىر جاعىنان وسىنداي شارا ارقىلى ەلىمدى تانىتىپ جاتقانىما ماقتاندىم.