استانادا قانداي تاسىلدەرمەن قوسىمشا تابىس تابۋعا بولادى

استانا. قازاقپارات - استانادا ءوز اۆتوكولىگىڭمەن قانداي تالاپتار بويىنشا تاكسي قىزمەتىندە قوسىمشا تابىس جاساۋعا بولاتىنىن قازاقپارات ءتىلشىسى زەرتتەپ شىقتى.

ءبىز ەلورداداعى تاكسي قىزمەتتەرىمەن بايلانىسىپ، دەمالىس كۇندەرى قوسىمشا اقشا تابۋ ءۇشىن جۇرگىزۋشى مەن اۆتوموبيلگە قويىلاتىن تالاپتار جونىندە بىلگەن بولاتىنبىز.

انىقتالعانداي، ەگەر نيەت بولسا، تاپسىرىس بەرۋشىلەر وتە كوپ كورىنەدى. ماسەلەن، «ەكونوم» تاكسيى تاراپىنان قويىلاتىن تالاپتارعا توقتالاتىن بولساق، الدىمەن، ءوز اۆتوكولىگىڭمەن كومپانيانىڭ كەڭسەسىنە بارۋ قاجەت. ول جەردە ماماندار كولىكتى ەگجەي-تەگجەيلى تەكسەرىپ شىعادى. تەلەفون ارقىلى بولعان اڭگىمەدە كومپانيا وكىلى تەمىر تۇلپاردىڭ شىققان جىلىنا قاتىستى قاتاڭ تالاپ جوق ەكەنىن ايتىپ، تەك قانا كولىكتىڭ تەحنيكالىق جاعدايى جاقسى بولۋىنا ءمان بەرىلەتىنىن جەتكىزدى.

«اندرويد تۇعىرناماسىندا ىستەيتىن تەلەفون كەرەك. ءسىز وسىعان دەيىن ەست باعدارلاماسى بويىنشا جۇمىس ىستەپ كوردىڭىز بە؟ بىزدە ايىنا ابونەنتتىك تولەم 14 مىڭ تەڭگە جانە وعان قوسا ءاربىر تاپسىرىس ءۇشىن 15 تەڭگە ۇستالادى. ءسىز تاپسىرىس العان كەزدە، كليەنتتەرگە كولىكتىڭ شىققاندىعى تۋرالى حابارلاندىرۋ تۇسەدى، ال ناقتى ۇيگە جەتكەندە ەكىنشى كەلتەحات بارادى. جالپى، اتقارىلعان جۇمىسقا 15 تەڭگە ۇستالادى. بۇل پايىزدىق الىم ەمەس، ياعني بۇل قۇن ادامداردى تاسىمالداعان سوماعا بايلانىستى ەمەس. ەگەر دە سىزدە تاريف 5-6 مىڭ تەڭگە بولسا دا، 15 تەڭگە تولەيسىز. قازىر بىزدە اكسيا ءجۇرىپ جاتىر. 5 مىڭ تەڭگە تولەمدى ەنگىزىپ، باستاپقىدا 10 كۇن قىزمەت ەتەسىز. تالاپتار ۇناعان جاعدايدا، 10 كۇننەن كەيىن قايتادان كەلەسىز دە، قالعان 9 مىڭ تەڭگەنى تولەيسىز. بىزدە تاپسىرىستار وتە كوپ»، - دەدى تاكسي ديسپەتچەرى تەلەفون ارقىلى اڭگىمەدە.

مۇنىمەن قوسا، «ارزان» تاكسيىنىڭ دە تالاپتارىن كوپشىلىك نازارىنا ۇسىنۋدى ءجون كورىپ وتىرمىز. «اندرويد تۇعىرناماسىنداعى تەلەفون قاجەت، ەست باعدارلاماسىمەن جۇمىس ىستەيمىز. بىزدە تىركەۋدەن ءوتۋ تەگىن، الايدا ەكى مىڭ تەڭگە ءوزىڭىزدىڭ بالانسىڭىزدى تولتىرۋعا كەرەك بولادى. ءبىر تاپسىرىستان 10 پايىز الامىز»، - دەپ حابارلاندى كومپانيادان.

بۇدان بولەك، «ازيا» تاكسيى كەڭسەسىنەن بەرىلگەن مالىمەتكە قاراعاندا، وسىنداعى تالاپتار وزگەشەلەۋ ەكەن. «ەكى اپتادا تاۋلىگىنە 100 تەڭگەدەن ىستەيسىز، كەيىننەن 400 تەڭگە بولادى. ساقتاندىرۋ مەن قىزمەت كورسەتۋ جۇرگىزۋشىنىڭ وزىنەن. تاپسىرىس وتە كوپ، اۆتوكولىك جەتىسپەي جاتىر»، - دەيدى كومپانيا وكىلى.

بارلىق تاكسي قىزمەتتەرى الدىمەن بەتپە-بەت اڭگىمەلەسۋگە جانە كولىكتى تەكسەرۋدەن وتكىزۋگە شاقىرادى. ەڭ باستى، اۆتوموبيلدىڭ تەحنيكالىق جاعدايى تالاپتارعا ساي بولۋى ءتيىس. ج ك و ورىن العاندا اكىمشىلىك جاۋاپكەرشىلىكتى وزىنە المايدى. ساقتاندىرۋ قۇجاتى كولىكتىڭ يەسىنىڭ قالتاسىنان تولەنەدى.