رەسەي مەملەكەتتىك دۋماسىنىڭ دەپۋتتارى سوزدەرىنە اباي بولۋلارى كەرەك - ماۋلەن اشىمبايەۆ
وسىعان بايلانىستى ءماجىلىس دەپۋتاتى، ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ماۋلەن اشىمبايەۆ ر ف دۋما دەپۋتاتتارىنا مەملەكەتتەردىڭ تاۋەلسىزدىگى مەن اۋماقتىق تۇتاستىعىنا قاتىستى سوزدەرىنە اباي بولۋى كەرەكتىگىن ەسكەرتتى، دەپ حابارلايدى قازاقپارات.
رەسەي فەدەراتسياسى قازاقستان ءۇشىن ەۋرازيالىق ەكونوميكالىق وداق پەن ۇ ق ش ۇ بويىنشا باستى سەرىكتەستەردىڭ ءبىرى سانالادى. سونداي- اق بۇل ەل قازاقستاننىڭ ساۋدا- ەكونوميكالىق جانە مادەني- گۋمانيتارلىق سالالارى بويىنشا دا ماڭىزدى سەرىكتەسىنىڭ ءبىرى. ەكى ەلدىڭ پرەزيدەنتتەرى بارلىق فورۋمدار مەن الاڭداردا ءوزارا قولداۋ مەن تۇسىنىستىك تانىتىپ كەلەدى.
«بۇل ۇكىمەتتەر مەن پارلامەنتتەر دەڭگەيىندەگى ءوزارا ءىس- قيمىلدارعا دا بايلانىستى. وسى ورايدا ر ف - مەن قاتىناستاردىڭ جوعارى دەڭگەيىنە قازاقستان تاۋەلسىزدىگىنىڭ 25 جىلدىعى قارساڭىندا رەسەي فەدەراتسياسى مەملەكەتتىك دۋماسىنىڭ ءتوراعالىعىنا سايلانعان ۆياچەسلاۆ ۆولوديننىڭ العاشقى رەسمي ساپارى دالەل بولىپ وتىر. سوندىقتان دا قازاقستانعا اۋماقتىق نارازىلىعى بويىنشا مەملەكەتتىك دۋمانىڭ دەپۋتاتى شپەروۆ ايتقان سوزدەر قيسىنعا كەلمەيدى دەپ ويلايمىن. وسى تەكتەس پىكىرلەر قازاقستان مەن رەسەيدىڭ دوستىق ءارى تاتۋ كورشىلىك قاتىناستار رۋحىنا سايكەس ەمەس. سەبەبى، ەكى ەلدىڭ قاتىناستارى ستراتەگيالىق سەرىكتەستىك ۇستانىمدارىنا نەگىزدەلگەن»، - دەيدى اشىمبايەۆ.
وسى رەتتە دەپۋتات قازاقستاننىڭ تاۋەلسىزدىگى مەن اۋماقتىق تۇتاستىعى بەرىك ءارى تۇراقتى ەكەنىن اتاپ ءوتتى. ءبىزدىڭ شەكارالار حالىقارالىق كەلىسىمدەردە ايقىندالىپ، بەكىتىلگەن. سوندىقتان ءبىزدىڭ مەملەكەتتىڭ اۋماقتىق تۇتاستىعىنا كۇمان كەلتىرۋگە ەشكىمنىڭ دە قۇقىعى جوق.
«مەملەكەتتىك دۋمانىڭ دەپۋتاتتارى مەملەكەتتەردىڭ تاۋەلسىزدىگى مەن اۋماقتىق تۇتاستىعىنا قاتىستى ماسەلەلەردە سوزدەرىنە اباي بولۋى كەرەك دەپ پايىمدايمىن. سونداي- اق ولار ستراتەگيالىق سەرىكتەستىك، ءبىزدىڭ ەلدەر مەن حالىقتار اراسىنداعى ىنتىماقتاستىق پەن دوستىق ۇستانىمدارىنا ەرەكشە ءمان بەرۋى قاجەت»، - دەپ تۇيىندەدى ءسوزىن ءماجىلىس كوميتەتىنىڭ ءتوراعاسى.
ەسكە سالا كەتەيىك، بيىل قاڭتاردىڭ اياعىنا قاراي وتانداستار تاقىرىبىنا ارنالعان پارلامەنەتتىك «دوڭگەلەك ۇستەل» باراسىندا دۋما دەپۋتاتى پ. شپەروۆ قازاقستانداعى ورىس جەرلەرىن قايتارۋ تۋرالى اڭگىمە قوزعاعان بولاتىن. الايدا رەسەي بيلىگى بۇل مالىمدەمەنى مەملەكەتتىڭ رەسمي ۇستانىمى ەمەس ەكەندىگىن ايتىپ اقتالعان ەدى. وسى ورايدا مەملەكەتتىك دۋمانىڭ دەپۋتاتتارى نەگىزسىز ءارى دالەلسىز ەموتسيالىق پىكىرلەر قارىم- قاتىناستارعا كەرى اسەرىن تيگىزەتىنىن اتاپ ءوتتى.
3- اقپاندا رەسەي سىرتقى ىستەر مينيسترلىگى شپەروۆتىڭ سوزىنەن سوڭ ينتەرنەتتە ەكى ەل بايلانىسىنىڭ تالقىعا تۇسۋىنە بايلانىستى ماسكەۋدىڭ قازاقستانمەن قارىم- قاتىناسى بويىنشا سىرتقى ساياساتى ماسەلەلەرىندەگى رەسمي ۇستانىمىن رەسەي پرەزيدەنتى، پرەمەر- ءمينيسترى، سىرتقى ىستەر ءمينيسترى جانە ۋاكىلەتتى تۇلعا عانا بىلدىرە الادى دەپ مالىمدەگەن.
اۆتور: رۋسلان عابباسوۆ
