قىتاي سپورتشىسى قولىمەن يتەرمەگەندە التىنعا تالاساتىن ەدىم - نۇربەرگەن جۇماعازيەۆ
سايىستان كەيىن سپورتشى تىلشىلەردىڭ ساۋالىنا جاۋاپ بەردى. نۇربەرگەن 500 جانە 1000 مەتر قاشىقتىقتىڭ بىرىندە چەمپيون اتانۋدى جوسپارلاپ وتىر ەكەن.
- جارىس كەزىندە ارىپتەسىڭىز قۇلاپ قالدى.
- ءبىز ءارقاشان ءبىر-بىرىمىزگە قولداۋ ءبىلدىرىپ وتىرامىز. سوندىقتان ونداي كەزدە ۋايىمدايسىڭ. كوماندالاس ارىپتەسىڭ قۇلاعان كەزدە ءوزىڭ قۇلاعانداي اسەردە بولاسىڭ. اسىرەسە، ودان كەيىن جۇگىرسەڭ، سەن دە قۇلاپ قالاتىنداي سەزىنەسىڭ. ساعان قاراپ، ءۇمىت ارتىپ وتىرعان جانكۇيەرلەردىڭ الدىندا ونداي نارسەنىڭ بولماعانى جاقسى عوي. ال بىردە-ءبىر قازاقستاندىق فينالعا شىقپاعانىنا قاتتى قىنجىلدىم.
- فينال تۋرالى ايتىپ وتسەڭىز؟
- سوڭعى جاعى قيىنداۋ سوقتى. ارتىندا كەلە جاتىپ بار كۇشىمدى سالىپ، سەرپىلىس جاساپ ەدىم. العا شىعۋعا تالپىنعاندا قىتايلىق قولىمەن كەدەرگى كەلتىردى. وسىلايشا جۇگىرىسىم باسەڭدەپ، اياقتارىم شارشاپ قالدى. ەگەر وزىپ شىقسام، كارىس سپورتشىسىمەن باسەكەلەسۋگە مۇمكىندىگىم بولار ەدى.
- وڭتۇستىك كورەيا كومانداسىنىڭ قارقىنى قالاي ەكەن؟
- كارىستەر - شورت-ترەكتەن الەم بويىنشا ۇزدىك. ولار ءبىر-بىرىنەن اسىپ تۇسەدى. ۋنيۆەرسياداعا كەلگەندەر - بىزبەن بىرگە الەم كۋبوگىندا ونەر كورسەتكەندەر. ەلىمىزگە ەڭ مىقتى قۇراماسى كەلدى. مەن ولاردىڭ بىرىنەن «سەندەردە نەگە ۋنيۆەرسيادانى جوعارى باعالايدى؟» دەپ سۇرادىم. ول جاقتا ۋنيۆەرسيادا جۇلدەگەرلەرىنە ءومىر بويى اي سايىن 300-400 دوللاردان تولەپ وتىرادى ەكەن. سوندىقتان كورەيا سپورتشىلارىنىڭ جەڭىسكە دەگەن قۇلشىنىستارى جوعارى.
- ەندىگى جوسپارىڭىز قانداي؟
- بۇيىرسا، التىن الساق دەپ ويلاپ وتىرمىز. جەكەلەي جارىستا 500 جانە 1000 مەتر قاشىقتىقتار بار. ەكەۋىنىڭ بىرەۋىندە چەمپيون اتانۋدى كوزدەپ وتىرمىن.
بەك تولەۋوۆ
baq.kz
