الەمگە تانىمال ءانشى ديماشتى كەزدەسۋگە شاقىردى
بۇل تۋرالى ديماشتىڭ دوسى ءارى رەسمي وكىلى الپامىس شاريموۆ حابارلادى. «بۇگىن بىزدە قۋانىشتى جاڭالىق! ديماشتىڭ ءانىن عالامتوردان تىڭداعان اتاقتى ءانشى لارا فابيان ادەمى تىلەكتەرىن ءبىلدىردى. ديماشتىڭ داۋىسىنا تاڭ قالىسىن جاسىرماي، كەزدەسۋگە شاقىردى!»، - دەپ جازدى الپامىس ءوزىنىڭ ينستاگرامداعى پاراقشاسىندا.
ولارعا ل. فابياننىڭ سازگەرى فلابيەن حابارلاسىپ، لارامەن ۋاتساپ مەسسەندجەرى ارقىلى سويلەسكەن ديالوگىن جىبەرگەن. الپامىس شاريموۆ كەزدەسۋ جايلى كەلىسسوزدەر ءجۇرىپ جاتقانىن جانە بۇل ديالوگتى فلابيەننىڭ رۇقساتىمەن جاريالاپ وتىرعانىن اتاپ ءوتتى.
فلابيەن: قازاقستاندىق مىنا ءانشى جىگىتتى ەستىپ كوردىڭ بە؟
لارا: ءيا، تاڭقالارلىق!
فلابيەن: ونىڭ داۋىس مۇمكىندىگىنىڭ كەڭدىگى وتە عاجايىپ!
لارا: ءان ورىنداۋ شەبەرلىگى وتە بيىك دەڭگەيدە! مىقتى داۋىس!
فلابيەن: ونىمەن كەزدەسسەك قالاي بولادى؟
لارا: نەگە كەزدەسپەسكە؟
ەسكە سالا كەتسەك، كەشە حۋنان تەلەارناسىنىڭ ەفيرىنەن «I am a singer» بايقاۋىنىڭ 3-كەزەڭى كورسەتىلدى. وندا ديماش قۇدايبەرگەن Queen توبىنىڭ ءانىن ورىنداپ، ءۇشىنشى ورىن الدى. بايقاۋ 10 كەزەڭنەن قۇرالعان. ازىرگە، ديماش جالپى ەسەپتە ءبىرىنشى ورىندا تۇر.
